निर्माणको तयारीमा रहेको फिल्म ‘जेरी अन टप’मा मुख्य अभिनेत्री फेरिएका छन् । करिब ६ महिना अगाडि नै फिल्ममा अनुबन्धित भइसकेकी अभिनेत्री आना शर्मालाई हटाएर निर्माण टिमले अर्की अभिनेत्री जसिता गुरुङलाई ‘कास्ट’ गरेको छ । अब यो फिल्ममा अभिनेता अनमोल केसीको जोडी जसितासँग बाँधिनेछ । यसअघि दुवैले ‘फर्की फर्की’मा पहिलोपटक एकसाथ काम गरेका थिए ।
फिल्मबाट आनालाई हटाउनुमा उनले व्यावसायिकता नदेखाएको निर्माता सरोज न्यौपानको भनाई छ । ‘हामीले ‘फोटोसुट’का लागि एक हप्ता अगाडिदेखि तयारी गरेका थियो । शनिबार दिउँसोसम्म पर्खिँदा पनि उहाँ आउनुभएन । न फोन उठ्यो । यसअघि पनि उहाँले यस्तै गर्नुभएको थियो । यसरी त काम गर्न सकिन्न भनेरै कलाकार फेर्यौं । सबैमा व्यावसायिकता भन्ने हुनुहुन्छ,’ उनले भने ।
करिब २ सातादेखि आना फिल्म ‘एक्टर’को छायांकनमा व्यस्त छिन् । यसले गर्दा उनी ‘जेरी अन टप’को कार्यशालामा सहभागी हुन पाएकी थिइनन् । र, शनिबारको ‘फोटोसुट’ समेत उनी नआएपछि निमाण टिमले उनको विकल्प खोजेको हो । तर, शनिबार आना ‘एक्टर’को छायांकन पनि उपस्थित नभएको जनाइएको छ । २०७१ सालमा प्रदर्शन भएको ‘जेरी’मा उनी नै मुख्य अभिनेत्री थिइन् ।
अभिनेत्री आँचल शर्माको समेत अभिनय रहने ‘जेरी अन टप’लाई सुयोग गुरुङले निर्देशन गर्दैछन् । यसअघि यो फिल्मलाई हेमराज विसीले निर्देशन गर्ने निश्चित भएको थियो । तर, उनी अमेरिका गएपछि फिल्ममा सुयोग भित्रिएका हुन् । सुयोगले यसअघि ‘फर्की फर्की’ निर्देशन गरेका थिए । आगामी साउन १ गतेदेखि छायांकन सुरु हुन लागेको फिल्मको निर्मातामा दीपक भण्डारी पनि छन् ।
