‘लभर गर्ल’को छवि बनाएकी अभिनेत्री पूजा शर्माले पहिलोपटक एक्सन भूमिकामा काम गरेको फिल्म ‘दान्भी’ले अपेक्षाकृत व्यापार गर्न सकेको छैन । यद्यपि, प्रदर्शनको दुई दिन (शुक्रबार र शनिबार) पूजाको स्टारडमको फाइदा भने फिल्मको व्यापारमा देखियो । केही हलमा उनका प्रशंसकहरुको उल्लेख्य उपस्थिति थियो । तर, आइतबारबाट फिल्मको व्यापारमा भारी गिरावट आएको छ ।
तथापि, पूजाले एक्सनमा भने तारिफ पाइरहेकी छन् । आइतबार काठमाडौंमा आयोजित विशेष शोमा सेलिब्रेटीहरुले समेत उनको एक्सनको प्रशंसा गरे । अभिनेता पुष्प खड्काले पूजालाई ‘अर्की हिम्मतवाली’को संज्ञा दिए । उनले भने, ‘यसको बलियो पक्ष भनेको नै एक्सन हो । रेखा थापा दिदीपछि एक्सनमा यति मज्जाले जमेको पूजा नै हो । उसको ‘एग्रेसिभ लुक’ एकदमै राम्रो देखिएको छ ।’
निर्देशक तथा अभिनेता दिनेश डिसीले त अहिलेसम्मका नायिकहरुमध्ये सबैभन्दा फिट एक्सन ‘दान्भी’मा देख्न सकिने ठोकुवा गरे । ‘पूजाको जीउका कारणले नायिकाहरुमध्ये फिट एक्सन गरेको यही फिल्ममा देखिन्छ,’ उनले भने, ‘अगाडिका नायिकाहरुले पनि एक्सन गर्नुभएको छ । तर, जीउको स्ट्रक्चरअनुसार उहाँहरुले गरेको एक्सन हामीले नराम्रो त भनेनौं तर नराम्रो नै लागेको थियो ।’
अभिनेता मलिका महत भने पूजाको एक्सनबाट प्रभावित भएकी छन् । आफूलाई पनि यसैगरी फिल्ममा एक्सन गर्ने इच्छा पलाएको उनी बताउँछिन् । ‘फिल्ममा पूजा दिदीको एकदमै मिहिनेत देखिएको छ । फिल्म हेरेपछि सबैलाई उहाँले जस्तै गर्न पाए हुन्थ्यो भन्ने लाग्छ नै । मलाई पनि यसरी एक्सन गर्न पाए हुन्थ्यो भन्ने भएको छ,’ उनले भनिन् । फिल्म पूर्ण प्याकेजको रहेको उनको दाबी छ ।
निर्देशक शोभित बस्नेतले भने ‘दान्भी’ तीनपटक हेरिसकेका छन् । फिल्ममा केही चीज भएकाले नै आफूले तेहेर्याएर हेरेको उनको भनाई छ । उनी पूजाको एक्सनबाट भने ‘सरप्राइज’ भएका छन् । ‘पूजालाई ‘सलुट’ नै गर्न मन लाग्यो । मलाई उसले यो हिसाबमा एक्सन गर्ला जस्तो लागेको थिएन । एक्सन मनपराउने दर्शकहरुले अवश्य ‘दान्भी’ हेर्नुहोला । फिल्म एकदमै राम्रो छ,’ उनले भने ।
फिल्मकर्मीहरुको प्रतिक्रियाबाट हर्षित देखिएकी पूजा आफ्नो कामबाट सन्तुष्ट रहेको बताउँछिन् । ‘एक्सनमा यो मेरो पहिलो प्रयास थियो । र, दर्शकहरुले जसरी मनपराइदिनु भएको छ, त्यसले हामीले गरेको काम सफल भएको अनुभूति गरेको छु,’ उनी भन्छिन्, ‘मलाई एक्सनमा दर्शकले रुचाउनुहुन्छ कि हुन्न भन्ने डर थियो । यसमा राम्रो प्रतिक्रिया मिलेकाले अब एक्सन फिल्म निरन्तर गर्छु ।’
