आगामी साउन ११ गतेदेखि प्रदर्शनमा आउन लागेको फिल्म ‘ईश्वर’को ‘तिमी आयौ’ बोलको रोमान्टिक गीत सार्वजनिक गरिएको छ । कृष्ण काफ्लेको स्वर, भीष्मराज फूलाराको शब्द रचना तथा अर्जुन पोखरेलको संगीत रहेको गीतमा फिल्मका अभिनेता पृथ्वीराज प्रसाईं र अभिनेत्री अनु शाहको ‘लभ केमेस्ट्री’ देख्न सकिन्छ । एक हप्ताअघि यो गीतको लिरिकल भिडियो रिलिज गरिएको थियो ।
राजु गिरीको निर्देशनमा तयार भएको फिल्ममा पृथ्वी र अनुसहित सुनिल थापा, शिशिर वाङ्गदेल, माओत्से गुरुङ, ध्रुव थापा, रविन्द्र झा, बुद्धि तामाङ, कृष्टि गुरुङ, सबिन बास्तोला आदिको अभिनय छ । दिव्या कंगना फिल्म्सको ब्यानरमा निर्माण भएको फिल्मका निर्माता हरिबहादुर थापा हुन् । लक्ष्मी कुँवर थापाको प्रस्तुतिमा बनेको फिल्मले अन्तरजातीय प्रेममा आउने अवरोधको कथा भन्छ ।
निर्देशक गिरी स्वयंको कथा र भोजराज देवकोटाको पटकथा तथा संवाद लेखन रहेको फिल्ममा रामेश्वर हुँमागाईको छायांकन, देव महर्जनको द्वन्द्व निर्देशन, कविराज गहतराज, देवेन्द्र पाण्डे र सुरेश पाण्डेको कोरियोग्राफी तथा अर्जुन पोखरेल, राजेन्द्र बजगाई र बीपी वाग्लेको संगीत छ । यो फिल्मबाट अनुले पाँच वर्षपछि कमब्याक गरेकी हुन् । उनको पछिल्लो प्रदर्शित फिल्म ‘पसिना’ हो ।
