आगामी साउन १८ गतेबाट प्रदर्शनमा आउन लागेको फिल्म ‘मोदीबेनी’को गत सोमबार पहिलो रोमान्टिक गीत ‘मन्जुरी’ सार्वजनिक गरिएको थियो । युट्युबमा गीतलाई उल्लेख्य भ्यूज प्राप्त नभए पनि प्रतिक्रिया राम्रो मिलेको छ । विशेषगरी गीतको अडियो पक्षको प्रशंसा भैरहेको छ । गीतमा फिचर्ड अभिनेत्री वर्षा सिवाकोटी र नव-अभिनेता अमर प्रताप श्रेष्ठको केमेस्ट्रीलाई पनि रुचाइएको छ ।

यसैबीच, फिल्मको टिमले ‘मन्जुरी’ गीतमा रिल प्रतियोगिताको घोषणा गरेको छ । यो प्रतियोगिताको समयसीमा आगामी साउन १५ गतेसम्म रहने निर्माता तथा कलाकार दीलिप केसीले जानकारी दिए । प्रतियोगितामा भाग लिनका लागि गीतमा रिल बनाएर आफ्नो फेसबुक, इन्स्टाग्रामको रिल र युट्युब शर्ट्समा अपलोड गरी रिलिज डेट र नामसहित फिल्मको फेसबुक पेजमा मेन्सन गर्नुपर्नेछ ।

सर्त पालना गरेर बनाइएको रिलहरुमध्ये गोलाप्रथाबाट ३ जनालाई विजेता घोषणा गरिनेछ । लोकल फार्म, घराना लाउन्ज, सिडिसी सिनेमा र केटिएम फिटनेसले विजेतालाई विभिन्न पुरस्कार तथा विशेष छुट सौजन्य गर्नेछन् । गीतमा रिल बनाउँदा फिल्मको पेजमा अपलोड गरिएका रिलहरुबाट गीतको अडियो प्रयोग गर्न सकिनेछ भने कोरियोग्राफीको स्टेपअनुसार पनि रिल बनाउन सकिनेछ ।

शंकर कोइरालाको डेब्यु निर्देशनमा तयार भएको फिल्ममा वर्षा र अमरसँगै सरोज खनाल, रेजिना उप्रेती, प्रवीण खतिवडा, दीलिप केसी, जीवन भट्टराई, कमलमणि नेपाल, सरोज अर्याल, अनामिका लामिछाने, स्नेहा भट्टराई, लाबिस लगायतको पनि अभिनय छ । रेजिनाले यो फिल्मबाट झण्डै १० वर्षपछि कमब्याक गरेकी हुन् । फिल्ममा उनले वर्षाकी आमाको भूमिका निर्वाह गरेको चर्चा छ ।