आगामी साउन ११ गतेदेखि प्रदर्शनमा आउने तयारीमा रहेको फिल्म ‘ईश्वर’को दोस्रो गीत ‘पूरा भयो सपना’ सार्वजनिक गरिएको छ । रवि ओड र बेनिशा पौडेलको स्वर रहेको गीतमा राजेन्द्र बजगाईंको संगीत तथा भीष्मराज फूलाराको शब्द छ । गीतमा फिल्मका मुख्य अभिनेता ध्रुव थापा र अभिनेत्री कृष्टि गुरुङ प्रस्तुत छन् । गीतले उनीहरुको एकअर्काप्रति प्रेम र समर्पणको भाव व्यक्त गर्छ ।
राजु गिरीको निर्देशनमा तयार भएको फिल्ममा ध्रुव र कृष्टिसहित सुनिल थापा, शिशिर वाङ्गदेल, माओत्से गुरुङ, अनु शाह, रविन्द्र झा, बुद्धि तामाङ, पृथ्वीराज प्रसाईं आदिले पनि अभिनय गरेका छन् । दिव्या कंगना फिल्म्सको ब्यानरमा निर्माण भएको फिल्मका निर्माता हरिबहादुर थापा हुन् । लक्ष्मी कुँवर थापाको प्रस्तुतिमा बनेको फिल्मले अन्तरजातीय प्रेममा आउने अवरोधको कथा भन्छ ।
निर्देशक गिरी स्वयंको कथा र भोजराज देवकोटाको पटकथा तथा संवाद लेखन रहेको फिल्ममा रामेश्वर हुँमागाईको छायांकन, देव महर्जनको द्वन्द्व निर्देशन, कविराज गहतराज, देवेन्द्र पाण्डे र सुरेश पाण्डेको कोरियोग्राफी तथा अर्जुन पोखरेल, राजेन्द्र बजगाई र बीपी वाग्लेको संगीत छ । आरआर फिल्मसले वितरण गर्न लागेको ‘ईश्वर’बाट अनु शाहले करिब ५ वर्षपछि कमब्याक गरेकी हुन् ।
