सन् २०१८ मा आएको सुपरहिट फिल्म हो, ‘स्त्री’ । २५ करोडमा बनेको फिल्मले त्यतिबेला भारतमा मात्रै १ सय ३० करोडमाथिको व्यापार गरेको थियो । राजकुमार राव, श्रद्धा कपूर र पंकज त्रिपाठीको मुख्य भूमिका रहेको फिल्मलाई हरर-कमेडी जनरामा हिन्दी फिल्मका लागि ‘ल्यान्डमार्क’ मानिन्छ । यसको चार वर्षपछि अब सिक्वेल आउँदैछ । आगामी अगस्ट १५ मा फिल्म प्रदर्शन हुँदैछ ।
बिहीबार फिल्मको ट्रेलर सार्वजनिक गरिएको छ । विक्की (राजकुमार) को गाउँमा फेरि श्रद्धा फर्किएकी छन् । उनलाई मानिसहरु किचकण्डी भन्ने गर्छन् । ट्रेलरमा राजकुमारसँग उनको प्रेम देखाइएको छ भने शिर काटिएको एक डरलाग्दो पुरुषको आतंक रोक्न श्रद्धा र राजकुमारले संघर्ष गरिरहेका छन् । राजकुमारको अभिनय, भिएफएक्स तथा ब्याकग्राउन्ड स्कोर ट्रेलरको सशक्त पक्ष हो ।
‘स्त्री २’लाई अमर कौशिकले निर्देशन गरेका हुन् । अमरले यो फ्रेन्चाइजसहित ‘बाला’ र ‘भेडिया’को पनि निर्देशन गरिसकेका छन् । पंकज त्रिपाठी, अपारशक्ति खुराना र अभिषेक बनर्जीको पनि अभिनय रहेको फिल्मले भारतमा मात्र करिब २ सय करोड व्यापार गर्ने आँकलन गरिएको छ । ट्रेलर हेर्दा यो सम्भव पनि देखिन्छ । फिल्मको एक गीतमा साउथ अभिनेत्री तमन्ना भाटियाको नृत्य छ ।
