निर्देशक सिमोस सुनुवारले यस वर्ष दुईवटा फिल्म बनाउने भएका छन् । अभिनेता सौगात मल्ललाई मुख्य भूमिकामा लिएर प्रदीप भारद्वाजको लेखनमा फिल्म ‘जन्ते बाख्रो’ निर्देशनको तयारीमा रहेका उनले अर्को फिल्ममा पनि सौगातलाई नै लिएका छन् । नाम भने तत्काललाई गोप्य राखिएको छ । यसअघि सिमोस र सौगातले दुई फिल्म ‘झ्यानाकुटी’ र ‘हात्तीछाप’मा सहकार्य गरेका थिए ।

सौगातसहित फिल्ममा अर्का अभिनेता अनुपविक्रम शाहीको पनि अभिनय रहने निश्चित भइसकेको छ । सौगात र अनुपले यसअघि ‘सौर्य’, ‘लप्पन छप्पन २’, ‘लाखे’ र ‘जार’ फिल्ममा एकसाथ काम गरिसकेका छन् । फिल्ममा उनीहरुको जोडी अहिलेका स्थापित अभिनेत्रीसँग बाँध्ने तयारी गरिएको छ । ‘कर्म ए प्रोडक्सन’को ब्यानरमा निर्माण हुन लागेको फिल्ममा प्रदीप भारद्वाजको लेखन छ ।

कर्म पिङ्की भुटियाको निर्माण रहने फिल्मलाई हरि हुमागाइँले छायांकन गर्नेछन् । दशैंपछि छायांकन सुरु गर्न लागिएको फिल्मलाई २०८२ साल अर्थात् सन् २०२५ मा प्रदर्शन गरिने निर्मात्री भुटियाले बताइन् । लामो समयदेखि व्यवसायमा सक्रिय उनले पहिलोपटक फिल्म निर्माण गर्न लागेकी हुन् । एक्सन कथावस्तुमा निर्माण हुन लागेको फिल्मको छायांकन नेपालसहित विदेशमा पनि गरिनेछ ।