सञ्जोग राईको डेब्यु निर्देशनमा तयार भएको फिल्म ‘देवी’ तिज विदा पारेर आगामी भदौ २१ गतेदेखि प्रदर्शनमा आउँदैछ । क्राइम-थ्रिलर कथामा बनेको फिल्ममा शिल्पा मास्के, गौरव पहारी र नाजिर हुसेन मुख्य भूमिकामा छन् । यसअघि शिल्पालाई चित्रित गर्दै क्यारेक्टर पोस्टर सार्वजनिक गरिएको थियो । जसमा उनी शंकास्पद भावमा प्रस्तुत थिइन् । र, हत्याको दृश्य पनि समावेश थियो ।
बुधबार फिल्मको अर्को दुईवटा पोस्टर सार्वजनिक गरिएको छ । जसमध्ये एउटामा गौरव पहारी चित्रित छन् । प्रहरीको भूमिकामा रहेका उनले कुनै रहस्यमय घटनाको अनुसन्धान गरिहेको देखिन्छ । दोस्रो पोस्टरमा नाजिर हुसेन गितार बजाउँदै प्रफुलित भावमा प्रस्तुत छन् । फिल्ममा उनी एक संस्थाको सञ्चालकको भूमिकामा रहेको जनाइएको छ । शिल्पा भने पत्रकारको भूमिकामा छिन् ।
एक्जिबिट स्टुडियोले बाँसुरी फिल्मससँग सहकार्य गरेको फिल्ममा महिलामाथि हुने यौनहिंसा विरुद्धको कथा उठाइएको छ । टीका पहारीको पनि अभिनय रहेको फिल्ममा रेमन गुरुङ, नारायण राई र सञ्जोग राई निर्माता, जावेद खान कार्यकारी निर्माता एवं उजेन नोर्वे गुरुङ र मिलन लामा सह-निर्मातामा छन् । जोएल फ्रोमले खिचेको ‘देवी’मा सञ्जोग राई र अजय गौतमको पटकथा लेखन छ ।
