विवाहअघि अभिनेत्री प्रियंका कार्कीको व्यस्तता फिल्ममा बढी थियो । त्यसपछि भने उनले विरलै फिल्म गरेकी छन् । बरु म्यूजिक भिडियो र रियालिटी शोमा व्यस्तता देखिन्छ । चाँडै फिल्म ‘माइली’मा काम गर्ने तयारीमा रहेकी उनले करिअरको सुरुवातदेखि नै हिरोइन मात्र भएर देखिने अडान लिएको देखिँदैन । फिल्ममा कहिले आमा त कहिले बुहारीको भूमिका निभाउँदै आइरहेकी छन् ।

कलालाई ‘यो खेल्छु र यो खेल्दिनँ’ भनेर आफूले कहिल्यै नहेर्ने उनको भनाई छ । बिहीबार ‘माछी’ बोलको गीत रिलिज कार्यक्रममा प्रियंकाले भनिन्, ‘मैले पहिलादेखि सीमित फिल्म वा गीत मात्र गर्छु भन्ने सोचेको भए म तेस्रो फिल्ममै आमाको भूमिका गर्दिनँ थिएँ होला । ‘नाइँ नभन्नू ल २’ मेरो करिअरको तेस्रो फिल्म थियो । यसैले म कलालाई यो खेल्छु र यो खेल्दिनँ भनेर हेर्ने मान्छे नै होइन ।’

फिल्ममा रोल कति लामो छ भनेर पनि आफूले नहेर्ने उनको जिकिर छ । उनलाई के विश्वास छ भने ५ मिनेटको रोलले पनि फिल्म खाइदिन सक्छ । ‘फिल्ममा मेरो रोल कति लामो छ भनेर हेर्दिनँ । पहिल्यैदेखि मैले त्यो कहिल्यै हेरिनँ । आफूले आफ्नो क्यारेक्टर र अभिनय राम्रोसँग गर्‍यो भने ५ मिनेट वा १० मिनेटको रोलले पनि फिल्म खाइदिन सक्छ भन्नेमा म विश्वास गर्छु,’ प्रियंका सुनिइन् ।

उनलाई विवाहपछि काम पाउन गाह्रो हुन्छ भन्ने पनि लाग्दैन । केलाई प्राथमिकता दिने भन्ने कुरा महत्त्वपूर्ण ठान्छिन् उनी । ‘कतिले विवाहपछि घरव्यवहार मात्रै सम्हाल्छु भन्ने पनि सोच्नुहुन्छ । त्यो पनि आफैंमा एउटा उदाहरण हो । घर सम्हाल्नु सजिलो छैन । तर, विवाह र सन्तानपछि पनि कामलाई प्राथमिकता दिन्छु भनेर अगाडि बढ्दा त्यस्तो समस्या आउँछ भन्ने लाग्दैन,’ उनको अनुभव छ ।

प्रियंका यसपालिको साउनमा नियमित व्रत समेत बसिरहेकी छन् । केही घटनाले उनलाई हनुमानप्रति विश्वास र आस्था बढेको छ ।यसैले साउनभरि नै उनी सोमबार र मंगलबार व्रत बस्दैछिन् । उनी भन्छिन्, ‘म ‘विलिभ इनर्जी’मा विश्वास गर्छु । कुनै कुराले मलाई तानिरहेको छ भने प्रयास गरुँ भन्ने भइहाल्छ । यो महिना यस्तै परिरहेको छ ।’ यतिबेला उनी ‘रोडिज’को छायांकनमा व्यस्त छिन् ।