कन्टेन्ट क्रियटरको रूपमा परिचित निमेष श्रेष्ठको डेब्यु निर्देशनमा फिल्म ‘लाइफ ड्यामेज’ बन्ने भएको छ । शुक्रवार काठमाडौंको कमलादीस्थित गणेश मन्दिरमा क्यामेरा, स्क्रिप्ट तथा क्ल्याप बोर्ड पूजा गर्दै फिल्मको मुहूर्त गरियो । ‘फेन्टासी कमेडी ड्रामा’ विधामा बन्न लागेको फिल्ममा निर्देशक श्रेष्ठ स्वयं मुख्य भूमिकामा देखिँदैछन् भने उनको जोडी भएर अभिनेत्री सुरक्षा पन्त प्रस्तुत हुँदैछिन् ।
फन रिभोलुसन इन्टरटेनमेन्टको ब्यानरमा बन्ने फिल्ममा सुरक्षा र निमेषसँगै ईशा थापा, सञ्जना महर्जन, अमोघ अर्याल, अनिस जङ्ग थापा, अजय पन्त, निरू खड्का लगायतको पनि अभिनय रहनेछ । फिल्मबारे निर्देशक श्रेष्ठ भन्छन्, ‘अर्काको जुत्तामा उभिँदा वा अरूको जीवन बाँच्दा हुने अनुभव कस्तो हुन्छ भनेर यसमा देखाउँदै छौं ।’ फिल्ममा निमेष श्रेष्ठ र ईशा थापाको संयुक्त लेखन छ ।
यसमा प्रवीण खड्काको डिओपी, निमा श्रेष्ठको सम्पादन, अभिषेक खरेलको प्रोडक्सन डिजाइन, आयुष महर्जनको कला निर्देशन, वर्षा श्रेष्ठको मेकअप, जेनिश शाक्यको प्रोडक्सन व्यवस्थापन, दीपेश चौधरीको कलर ग्रेडिङ, उत्साह श्रेष्ठको कस्ट्युम डिजाइन एवं आशिष सापकोटाको ग्राफिक्स तथा फाइनान्स रहनेछ । सुरक्षा फिल्ममा आफ्नो चरित्रलाई लिएर निकै उत्साहित देखिएकी छन् ।
