अभिनेता पल शाह र अभिनेत्री बेनिशा हमालले पहिलोपटक फिल्ममा सहकार्य गर्ने भएका छन् । ‘बुलाकी’ फेम्ड निर्देशक लक्ष्मण सुनारको आगामी फिल्म ‘कल्ली’मा उनीहरुले एकसाथ काम गर्न लागेका हुन् । मंगलबार फर्स्टलुक पोस्टर सार्वजनिक गर्दै फिल्म निर्माणको घोषणा गरियो । पोस्टरले फिल्म एक्सन प्रधान हुने संकेत गर्छ । निर्देशक सुनारले फिल्म पौराणिक कथामा बन्ने बताए ।
रेड वर्ड प्रडक्शन र कस्तुरी प्रडक्शनको संयुक्त ब्यानरमा निर्माण हुन लागेको फिल्ममा निर्देशक सुनार स्वयंको कथा छ भने महेश दवाडीको पटकथा तथा संवाद लेखन छ । किरण नेपाली प्रस्तुतकर्तामा छन् । उनले यसअघि ‘हात्तीछाप’, ‘दुई नम्बरी’, ‘पोइ पर्यो काले’ जस्ता फिल्म बनाइसकेका छन् । छायांकन नहुँदै आगामी चैत २९ गतेलाई फिल्मको प्रदर्शन मिति पनि घोषणा गरिएको छ ।
फिल्मको छायांकन कर्णाली प्रदेशका विभिन्न स्थानमा गर्ने तयारी भइरहेको छ । तिहारपछि छायांकन सुरु हुनेछ । पलका यस वर्ष ‘कल्ली’सहित तीन फिल्म रिलिज हुने भएका छन् । आगामी भदौ २१ गते ‘रावायण’ प्रदर्शन हुँदैछ भने सम्भवतः तिहार आसपासमा उनको अर्को फिल्म ‘मायावी’ आउन सक्नेछ । उनको पाइपलाइनमा ‘अवतार’, ‘मायाका रंगहरु’ र ‘मोहर’ जस्ता फिल्म पनि छन् ।
