आगामी भदौ १४ गतेदेखि प्रदर्शनमा आउन लागेको फिल्म ‘वर एण्ड वधु’को दोस्रो गीत सार्वजनिक गरिएको छ । ‘इतिहासमै चर्चा चल्छ’ बोलको डान्सिङ गीतमा ‘कोभन्दा को कम’ भन्ने शैलीमा बिहे गर्न तम्सिएका दुई परिवारबीचको घम्साघम्सीलाई देखाइएको छ । जसमा आँचल शर्मा, विवेक कर्माचार्य, गरिमा शर्मा, विजु पार्की, कुसुम शर्मा लगायतका कलाकारहरु नृत्य गर्दै प्रस्तुत छन् ।
गीतमा राजेशपायल राई र मेलिना राईको स्वर, अर्जुन पोखरेलको संगीत र मुक्ता उदासको शब्द रचना छ । यो गीतलाई फिल्ममा कथावाचनको रुपमा प्रयोग गरिएको निर्देशक मिलन चाम्सले बताए । विवाह संस्कृतिको कथालाई उठाएको फिल्ममा विजय लामा, किरण केसी, सरिता लामिछाने, हिमेश पन्त, यमन श्रेष्ठ, रविन्द्र खड्का, अंशु महर्जन, सिता न्यौपाने लगायतको पनि अभिनय छ ।
जानुका थापा निर्माता र अमृत रिजाल (रोमानिया) कार्यकारी निर्माता रहेको फिल्ममा सुदीप बरालको छायांकन, प्रदीप भारद्वाजको स्क्रिप्ट लेखन, मिलन श्रेष्ठको सम्पादन, कविराज गहतराज र अनिसा स्याङ्देनको कोरियोग्राफी तथा हिमाल केसीको द्वन्द्व निर्देशन छ । ५० प्रतिशत रोमानियामा र बाँकी काठमाडौंमा छायांकन भएको यो फिल्मबाट विवेकले अभिनेताको रुपमा डेब्यु गरेका छन् ।
