आगामी भदौ २१ गते (तीज)बाट प्रदर्शनमा आउन लागेको फिल्म ‘देवी’को टिजर सार्वजनिक गरिएको छ । नाबालिक बलात्कारको घटनालाई टिजरमा देखाइएको छ । पीडितको बयान र स्केच तयार हुँदा पनि निरीह बनेको प्रहरी र बलात्कारीको हत्या गर्दै हिँड्ने पात्रको कथामा फिल्म केन्द्रित रहेको टिजरले खुलासा गर्छ । फिल्मप्रति दर्शकलाई कौतुहलता जगाउन सक्ने सामर्थ्य टिजरमा छ ।
क्राइम-थ्रिलर जनरामा निर्माण भएको फिल्मका निर्देशक सञ्जोग राई हुन् । फिल्ममा निर्देशक राई र अजय गौतमको संयुक्त लेखन रहेको छ । एक्जिबिट स्टुडियोले ‘कबड्डी’ निर्माण कम्पनी बाँसुरी फिल्म्ससँग सहकार्य गरेको फिल्ममा शिल्पा मास्के, गौरव पहारी, नाजिर हुसेन, टीका पहारी, ध्रुब कोइराला, विशाल पहारी, निरु खड्का, जीवन जंग खड्का, निरिक्षा घतानी आदिको अभिनय छ ।
रेमन गुरुङ, नारायण राई र सञ्जोग राईको निर्माण रहेको फिल्मको कार्यकारी निर्मातामा जावेद खान तथा सह-निर्माताहरुमा उजेन नोर्वे गुरुङ, मिलन लामा, शिल्पा मास्के र नारायण गुरुङ छन् । यसमा जोएल फ्रोमको डीओपी, सन्जेन थापाको द्वन्द्व निर्देशन तथा सन्तोष दवाडी र इयान स्कट क्लेमेन्टको सम्पादन रहेको छ । फिल्मलाई मनोज राठी र उज्वल पौडेलले देशभर वितरण गर्दैछन् ।
