सुपरस्टार राजेश हमालको ‘कमब्याक’ फिल्मको शीर्षक घोषणा गरिएको छ । बिहीबार एक थिम पोस्टरमार्फत् शीर्षक सार्वजनिक गरिएको हो । फिल्मको नाम ‘नरसिंहाः अवतार’ राखिएको छ । शीर्षकले नै फिल्म एक्सन प्रधान रहने बुझाउँछ । पोस्टरको एउटा भागमा निलो (समुद्रको रङ) र अर्कोतर्फ आगोको ज्वाला देख्न सकिन्छ । यसले फिल्मको कथा युद्ध र शान्तिको हुने संकेत गर्छ ।

हिन्दु धर्मका अनुसार नरसिंहा भगवान विष्णुको चौथो अवतार हो । यसलाई विष्णुको रौद्र रुप मानिन्छ । दैत्यराज हिरण्यकश्यपको बध गर्न र भक्त प्रह्लादको उदार गर्नका लागि विष्णु भगवानले नरसिंहा अवतार धारण गरेका थिए । उनको आधा शरीर सिंहको र आधा मानिसको थियो । त्यसपछि विष्णुले हिरण्यकश्यपको बध गरेका थिए । फिल्ममा हमालको नाम नरसिंहा रहने बुझिएको छ ।

यो फिल्मको निर्देशन दीवाकर भट्टराईले गर्नेछन् । उनले यसअघि ‘ऐश्वर्य’, ‘क्याप्टेन’, ‘मायावी’, ‘स्टुपिड मन’ जस्ता फिल्मको निर्देशन गरिसकेका छन् । क्रिएटिभ सिने आर्ट प्रालिको प्रस्तुतिमा बन्न लागेको फिल्मको लगानी अनुमानित तीन करोड हुने बताइएको छ । यो फिल्ममा हमालका साथै अभिनेता राज कटुवालको पनि अभिनय रहनेछ । आगामी भदौबाट फिल्मको छायांकन सुरु गरिँदैछ ।

हमालले पछिल्लोपटक मुख्य भूमिकामा अभिनय गरेको फिल्म ‘शकुन्तला’ थियो, जुन सन् २०१६ मा रिलिज भएको थियो । यसको असफलतापछि उनले अफर आएका दर्जनौं फिल्म अस्वीकार गरे । कमब्याकका लागि उनले ‘सत्यम्’ र ‘मायाको माया’ गरी दुई फिल्म सम्झौता गरेको भए पनि ती निर्माण भएनन् । अब दीवाकरको फिल्मबाट हमालको करिअरको दोस्रो ‘इनिङ्स’ सुरु हुँदैछ ।