मल्टीस्टारर फिल्म ‘के घर के डेराः घर नम्बर २’को छायांकन सुरु गरिएको छ । नाग पञ्चमीको अवसर पारेर शुक्रबार ललितपुरको भैसेँपाटीस्थित कार्यविनायक मन्दिरमा मुहूर्त गरेपश्चात् गोदाबरीबाट छायांकन थालिएको हो । पहिलो दिन अभिनेता आर्यन सिग्देल र अभिनेत्री केकी अधिकारीको दृश्यको छायांकन गरिएको छ । उनीहरुको लगभग एक दशकपछि फिल्ममा सहकार्य भएको हो ।

शनिबारबाट फिल्मका तीन शीर्ष कलाकारहरु खगेन्द्र लामिछाने, निश्चल बस्नेत र उपासना सिंह ठकुरी पनि छायांकनमा जोडिनेछन् । फिल्ममा प्रकाश घिमिरे, श्रृजना नापित, संजोग रसाइली, बाल-कलाकार रुविना घिमिरे आदिको पनि अभिनय रहनेछ । घरबेटी र डेरावालको कथामा केन्द्रित भएर बन्न लागेको फिल्मका निर्देशक दीपेन्द्र के. खनाल हुन् । छायाँकारमा कृष्णबहादुर थापा छन् ।

‘कर्नाली ब्लुज’, ‘फिरफिरे’ जस्ता पुस्तकका लेखक बुद्धिसागरले यो फिल्म लेखेका हुन् । पहिलो पटक उनको लेखनमा फिल्म बन्न लागेको हो । शरद श्रेष्ठ, किरण महर्जन र राजिव श्रेष्ठ निर्माता तथा युवराज कार्की कार्यकारी निर्माता रहेको फिल्मलाई यसै वर्ष रिलिज गरिँदैछ । यो फिल्म २०७९ सालमा आएको ‘के घर के डेरा’को सिक्वेल हो । त्यतिबेला यो फिल्म ‘सेमी हिट’ भएको थियो ।