नेपाली फिल्म 'रावायण'को दोस्रो पोस्टर सार्वजनिक भएको छ। आगामी भदौ २१ गतेदेखि प्रदर्शनमा आउन लागेको यस फिल्ममा नायक पल शाह र नायिका पूजा शर्मा प्रमुख भूमिकामा देखिएका छन्। पोस्टरमा पल शाहलाई गम्भीर भावमा प्रस्तुत गरिएको छ, भने पूजा शर्मा आक्रोशित मुद्रामा देखिएकी छन्, जसले फिल्मको कथावस्तुलाई सङ्केत गर्दछ।
पोस्टरको पृष्ठभूमिमा 'एसिड आक्रमण गर्ने अपराधीलाई कारबाही गर' भन्ने ब्यानरसहित प्रहरी कार्यालय अगाडि प्रदर्शन गरिरहेको एक समूहलाई देखाइएको छ, जसले फिल्मको केन्द्रमा एसिड आक्रमणविरुद्धको सङ्घर्षलाई राखेको प्रस्ट हुन्छ। यसअघि, पल शाहको सोलो फस्टलुक पोस्टरले पनि राम्रै चर्चा पाएको थियो।
फिल्मको निर्देशन सुदर्शन थापाले गरेका छन्, र निर्माणमा पूजा शर्मा र सुदर्शन थापा प्रोडक्शनको संयुक्त सहकार्य रहेको छ। फिल्ममा पल शाह र पूजा शर्मासहित प्रियङ्का कार्की, प्रमोद अग्रहरी, निकीता चण्डक, अर्जुनजंग शाही, प्रकाश शाह, शर्मिला मल्ल र प्रदीप ढकालजस्ता कलाकारहरूको पनि अभिनय रहेको छ।
फिल्मको एक्सनपूर्ण टिजर सार्वजनिक भइसकेको छ, जसमा पल शाहको दमदार एक्सनले दर्शकहरूको मन जितेको छ। कथा सुदर्शन थापाले लेखेका छन् भने पटकथा शिवम अधिकारीले तयार पारेका हुन्। सौरभ लामाले छायाङ्कन गरेको यो फिल्मको सम्पादन मिलन श्रेष्ठले गरेका छन्।
