निर्माता अर्जुन कुमारले आफ्नो आगामी फिल्म ‘सानो संसार’को प्रदर्शन मिति हेरफेर गरेका छन् । यसअघि असोज १७ गते अर्थात् घटस्थापनामा आउने भनिएको फिल्म अब एक हप्ता अगाडि नै हलमा लाग्नेछ । आइतबार एउटा पोस्टरमार्फत् आगामी असोज ११ गतेलाई नयाँ प्रदर्शन मिति घोषणा गरिएको हो । अब घटस्थापनाको अर्को फिल्म ‘बेहुली फ्रम मेघौली’ प्रतिस्पर्धीविहीन बनेको छ ।
पारिवारिक कथावस्तुमा निर्माण भएको ‘सानो संसार’मा हास्य कलाकार केदार घिमिरे ‘माग्ने बुढा’की श्रीमती सीतादेवी तिमल्सेनाको मुख्य भूमिका छ भने राज पंगेनी शर्मा, अनु दाहाल, अन्जसा रिजाल शिशिर सिवाकोटी लगायतको पनि अभिनय छ । यो फिल्ममा सिद्धार्थ पुडासैनीको लेखन तथा निर्देशन छ । फिल्मको स्क्रिप्ट लेखनमा निर्देशक पुडासैनीलाई सरिष्मा पुडासैनीले सघाएकी छन् ।
राजधानी मिडिया एड प्रोडक्सन एवं प्रिन्सेस मूभिजको व्यानरमा सिनेमा निर्माण भएको फिल्मका कार्यकारी निर्मातामा माधव वाग्ले रहेका छन् । सोमबार फिल्मको पहिलो गीत ‘मगमग फूलबारी’ सार्वजनिक गर्ने तयारीमा निर्माण टिम छ । यसअघि सन् २००८ मा पनि ‘सानो संसार’ शीर्षकमा फिल्म बनेको थियो । त्यही शीर्षक सापटी लिएर भिन्न कथामा निर्माता कुमारले फिल्म बनाएका हुन् ।
