अभिनेता सौगात मल्लको शीर्ष भूमिका रहेको फिल्म ‘बम बहादुर’ आगामी कार्तिक ३० गतेबाट प्रदर्शनमा आउने निश्चित भएको छ । आइतबार प्रदर्शन मिति घोषणा गर्दै निर्माण टिमले फर्स्टलुक पोस्टर सार्वजनिक गरेको छ । जसमा सौगात लडाकुको पोसाकमा चित्रित छन् । पृष्ठभूमिमा बन्दुक बोकेका सैनिकहरू देखिन्छन् । फिल्मले द्वन्द्वकालीन समयको कथा भनेको पोस्टरले संकेत गर्छ ।
जोन राईको निर्देशनमा तयार भएको यो फिल्ममा प्रशान्त राई, अनिशा रसाइली, भास्कर प्रधान, महेन्द्र बग्दास, मदन भुजेल, भरत वशिष्ठ, रिया भुजेल, शान्तिला तामाङ, बाल कलाकार वाशित कार्की, सुरेश पाँचकोटी लगायतको पनि अभिनय रहेको छ । सञ्जीव सार्की निर्माता रहेको फिल्ममा जोन राई र रुपेश तामाङको कथा तथा पटकथा छ भने सुजोय कुमार घोष (मुन्ना)को छायाङ्कन छ ।
निर्देशक राईले फिल्ममा सस्पेन्स, थ्रिलर, प्रेम र सामाजिक कथाको समिश्रण रहेको बताए । ‘यसको कथाले दर्शकलाई बम बहादुर (सौगात मल्ल)को बाल्यकालको स्मरणमा पुर्याउँछ, जहाँ उसका सुन्दर पलहरू एकाएक विगतको एक घटनाले छिन्नभिन्न हुन्छन् । फिल्म वर्तमान र विगतको कथा जोड्दै एउटा नाटकीय क्लाइमेक्समा टुङ्गिन्छ, जसले दर्शकलाई रोमाञ्चक बनाउँछ,’ उनले भने ।
