यही भदो १४ गतेदेखि प्रदर्शनमा आउने तयारीमा रहेको फिल्म ‘वर एन्ड वधु’को प्रचारमा अभिनेत्री आँचल शर्मा र अभिनेता विवेक कर्माचार्यको राम्रै दौडधुप देखिन्छ । यसै साता पूर्व जिल्ला पुगेर फिल्मबारे जानकारी गराएका उनीहरुले मिडियामा पनि उपस्थिति जनाइरहेका छन् । यसैबीच, कृष्ण जन्माष्टमीको अवसरमा सोमबार बनेपामा आयोजित कन्या पूजामा पनि उनीहरु सहभागी भए ।

आँचल र विवेकसहित फिल्मका कलाकारहरु किरण केसी, रविन्द्र खड्का, कुसुम शर्मा र विजु पार्कीले संयुक्त रुपमा कन्या पूजा गरेका थिए । त्यहाँ करिब १० हजारभन्दा बढीको उपस्थिति रहेको थियो । सो अवसरमा फिल्मका कलाकारहरुले एक हजार बढी बालबालिकालाई कापी तथा खानेकुरा वितरण गरेका थिए भने निर्माण टिमले १ लाख ११ हजार नगद सहयोग समेत गरेको थियो ।

सनातन कन्या पूजा प्रबन्ध समितिमार्फत हरेक वर्ष आयोजना हुँदै आएको कन्या पूजामा पहिलो पटक सहभागी हुन पाउँदा खुशी र आनन्द महसुस भएको आँचलले बताइन् । त्यस्तै, विवेकले आफूले विगत ४ वर्षदेखि निरन्तर कन्या पूजामा आएर विभिन्न कुराहरु दान गर्ने गरेको बताए । उनी बनेपा निवासी समेत हुन् । बनेपामा कन्या पूजा गर्ने करिब १२२ वर्ष पूरानो इतिहास रही आएको छ ।

मिलन चाम्सको निर्देशनमा बनेको फिल्ममा जानुका थापा निर्माता तथा अमित रिजाल कार्यकारी निर्मातामा छन् । फिल्ममा विजय लामा, अंशु महर्जन, गरिमा शर्मा, सरिता लामिछाने, हिउँवाला गौतम, हिमेश पन्त लगायतको पनि अभिनय छ । सुदिप बरालको छायांकन रहेको फिल्ममा प्रदीप भारद्वाजको कथा, पटकथा एवं संवाद छ । फिल्मको ट्रेलरलाई युट्युबमा दर्शकले रुचाएका छन् ।