दशैंलाई लक्षित गरेर आगामी असोज ११ गतेबाट प्रदर्शनको तयारीमा रहेको फिल्म ‘सानो संसार’को पहिलो गीत ‘मगमग फूलबारी’ सार्वजनिक गरिएको छ । सोमबार श्रीकृष्ण जन्माष्टमीको अवसर पारेर काठमाडौंमा एक कार्यक्रमबीच सार्वजनिक गरिएको गीतमा राजनराज सिवाकोटीको शब्द रचना तथा संगीत छ भने पार्श्व गायनमा मेलिना राईलाई संगीतकार सिवाकोटीले साथ दिएका छन् ।
विवाहको सेटअपमा तयार पारिएको लोक लयको यो गीतमा फिल्मका शीर्ष कलाकारहरु सीतादेवी तिमल्सिना (केदार घिमिरे ‘माग्ने बुढा’की श्रीमती), राज पंगेनी शर्मा, अनु दाहाल, अन्जसा रिजाल, शिशिर सिवाकोटी, सरिता भण्डारी र जीवन गौतम छमछमी नृत्य गर्दै देखिएका छन् । शरद महतोको छायांकनमा तयार भएको गीतमा सुजैन खड्का र मनोज खड्काको संयुक्त नृत्य निर्देशन छ ।
पारिवारिक कथावस्तुमा निर्माण भएको फिल्मलाई सिद्धार्थ पुडासैनीले निर्देशन गरेका हुन् । उनको यो डेब्यु निर्देशन हो । फिल्ममा अर्जुन कुमार निर्माता र माधव वाग्ले कार्यकारी निर्मातामा छन् । सरिष्मा खत्री र निर्देशक पुडासैनीको लेखन रहेको फिल्ममा प्रवीन खड्काको छायांकन र रोमी तन्डुकारको सम्पादन छ । ‘सानो संसार’ले एउटा सानो परिवारको कथालाई उठाएको जनाइएको छ ।
