बसन्त निरौलाको निर्देशनमा बनेको फिल्म ‘ज्वाइँ साब’को टिजर सार्वजनिक गरिएको छ । १ मिनेट ४१ सेकण्ड लम्बाईको टिजरले फिल्मको कथावस्तुबारे जानकारी गराउँछ । विवाहका लागि पात्रहरुले गरेको संघर्षलाई रोचक शैलीमा देखाइएको छ । टिजरको अन्तिममा अभिनेता जितु नेपाल र अभिनेत्री नीति शाह बेहुला-बेहुली बनेर देखिएका छन् । र, नीतिको घरमा जितु भित्रिएका छन् ।
मीनादेवी खड्क, सौगात पण्डित र पदमलाल तामाङको निर्माण रहेको फिल्ममा जितु र नीतिसहित बुद्दि तामाङ, शिशिर वाङ्देल, रमेश बुढाथोकी, प्रकाश घिमिरे, निमा पाण्डे, हिमेश पन्त, शिवहरी वैरागी, राजेन्द्र नेपाली, कविता आले लगायतको पनि अभिनय छ । विजय बस्याल कार्यकारी निर्माता रहेको फिल्ममा सविन अधिकारीको कथा र शंकर धितालको पटकथा एवं संवाद लेखन छ ।
राजकुमार पण्डितको प्रस्तुतिमा तयार भएको ‘ज्वाइँ साब’मा श्याम तामाङको छायांकन, सञ्जय थापाको द्वन्द्व एवं अर्जुन पोखरेल र महेश ताम्राकारको संगीत रहेको छ । यो फिल्म दशैंलाई लक्षित गर्दै आगामी असोज २४ गते (फूलपाती)बाट प्रदर्शनमा आउँदैछ । बक्स अफिसमा ‘छक्का पञ्जा ५’ र ‘१२ गाउँ’सँग यसको प्रतिस्पर्धा हुनेछ । यो भिडन्तलाई यस वर्षको सबैभन्दा ठूलो मानिएको छ ।
