टिजर, शीर्ष गीत र ट्रेलरपछि फिल्म ‘रावायण’को चर्चा चुलिएको छ । एक्सन दृश्यले फिल्मप्रति दर्शकमा हुटहुटी बढाएको देखिन्छ । कलाकारको ‘लाइनअप’ पनि बलियो भएकाले फिल्मले बक्स अफिसमा राम्रो व्यापार गर्न सक्ने धेरैको प्रक्षेपण छ । ‘रावायण’को व्यापारिक नतिजाले एक्सन फिल्मको भविष्य निर्धारण गर्ने विश्लेषण समेत भइरहेको छ । यसको अर्थ फिल्मप्रति अपेक्षा उच्च छ ।
यसैबीच, फिल्मको दोस्रो गीत सार्वजनिक गरिएको छ । ‘तिम्रै लागि’ बोलको प्रेमिल भावको गीतमा अभिनेता पल शाह र अभिनेत्री पूजा शर्मा प्रस्तुत छन् । रामजी लामिछानेको नृत्य निर्देशनमा बनेको गीतको मेकिङमा खर्च र मिहिनेत देखिन्छ । भारतका चर्चित गायक कुणाल गाञ्जावाला र गायिका सोनु कक्कडको गायन रहेको गीतमा कृष्णहरी बरालको शब्द तथा नीरज सिंहको संगीत छ ।
सुदर्शन थापाको निर्देशनमा बनेको फिल्ममा पल र पूजाका अलावा अर्जुनजंग शाही, शर्मिला मल्ल, प्रमोद अग्रहरी, प्रियंका कार्की, प्रकाश शाह, प्रदीप ढकाल, कैलाश रावल लगायतको अभिनय छ । यसमा सौरभ लामाको छायांकन, शिवम अधिकारीको लेखन, प्रदीप श्रीवास्तवको पटकथा तथा श्री श्रेष्ठको द्वन्द्व निर्देशन छ । ‘रावायण’ तीजको विदा पारेर यही भदौ २१ गतेदेखि प्रदर्शन हुँदैछ ।
