दशैंको अवसर पारेर आगामी असोज २४ गते फूलपातीदेखि प्रदर्शनमा आउन लागेको फिल्म ‘छक्का पञ्जा ५’को पहिलो गीत ‘बिहे भाको छैन म’ खासै चल्न सकेन । डेढ महिनामा गीतलाई युट्युबमा ४५ लाख भ्यूज छ । बरु यो गीतभन्दा एक हप्ता पछि आएको फिल्म ‘खुस्मा’को ‘रुकुम मैकोट’ गीतले एक करोड भ्यूज नघाएको छ । यसबाट पनि ‘बिहे भाको छैन म’ गीत नचलेको प्रष्ट हुन्छ ।
यसैबीच, ‘छक्का पञ्जा ५’को ‘ब्रेकअप’ बोलको दोस्रो गीत बुधबार सार्वजनिक गरिएको छ । गीतमा बाबुल गिरीको गायन, संगीत र शब्द रचना छ । फिल्मका कलाकारहरू दीपकराज गिरी, केदार घिमिरे, दीपाश्री निरौला, वर्षा सिवाकोटी, मेक्सम गौडेल, सुरवीर पण्डित लगायतलाई प्रस्तुत गरिएको गीतमा ब्रेकअपपछि प्रेमीले प्रेमिकाप्रति पोखेको आक्रोशलाई कमेडी शैलीमा देखाइएको छ ।
दीपाश्री निरौलाको निर्देशनमा तयार भएको फिल्ममा आर्यन सिग्देल, निर्मल शर्मा, तेज गिरी आदिको पनि अभिनय रहेको छ । हरि हुमागाइँको डिओपी तथा उत्तम हुमागाइँको छायांकन रहेको फिल्ममा दीपकराज स्वयंको पटकथा लेखन छ भने कथा र संवादमा उनलाई केदार घिमिरे र दीलिप तामाङले सघाएका छन् । फिल्ममा रोशन श्रेष्ठको द्वन्द्व निर्देशन तथा विपिन मल्लको सम्पादन छ ।
‘छक्का पञ्जा’को अघिल्ला चार सिरिज ब्लकबस्टर भएका थिए । पाँचौं सिरिज पनि सफल हुनेमा शंका छैन । तर, यसपटक चुनौती ठूलो छ । दुई नेपाली फिल्म ‘१२ गाउँ’ र ‘ज्वाइँ साब’ पनि फूलपातीमै आउन लागेकाले ‘छक्का पञ्जा ५’लाई असर गर्न सक्ने धेरैको आँकलन छ । त्यसमाथि असोज १८ गतेदेखि प्रदर्शन हुन लागेको हलिउड फिल्म ‘जोकर २’ले पनि ठूलो असर गर्न सक्ने देखिन्छ ।
