करिब दुई सातादेखि नेपाली र भारतीय प्राविधिक टिम लिएर छायांकन भइरहेको सन्तोष सेन निर्देशित फिल्म ‘बलिदान’को एक्सन दृश्य खिच्न सुरु गरिएको छ । बिहीबारदेखि पूर्वको इटहरीमा तयार पारिएको सेटमा अभिनेता समीर भट्टसहितका कलाकारहरूको एक्सन दृश्य खिच्ने काम भइरहेको निर्देशक सेनले जानकारी दिए । अब दशैं अघिसम्म एक्सन दृश्यहरू खिचिने उनको भनाई छ ।
फिल्मका लागि एक्सन दृश्यहरू दक्षिण भारतबाट आएका स्टनर सामको नेतृत्वमा ३० जनाको टिमले तयार पारिरहेको छ । सामले साउथका ‘तंगलान’, ‘हात्ती मेरे साथी’, ‘कथिर’ जस्ता फिल्महरुमा द्वन्द्व निर्देशन गरिसकेका छन् । अत्याधुनिक प्रविधिको प्रयोग गर्दै एक्सन दृश्यहरू छायांकन भइरहेको निर्देशक सेनले बताए । एक्सन दृश्यमा मात्र डेढ करोड बढी खर्च हुने अनुमान गरिएको छ ।
समीरसहित सौगात मल्ल, अर्पण थापा, दिव्य देव, ऋचा शर्मा लगायतको पनि अभिनय रहेको फिल्मले नेपालको सार्वभौम भूमिमा भइरहेका शोषण, अन्याय र समाजका तथाकथित नाइकेहरुविरुद्ध बलिदान दिनुपर्ने कथा उठाएको छ । फिल्मका लागि प्राविधिक सामग्रीहरू भारतबाट आयात गरिएको हो । फिल्ममा पवन ब्राडफोर्ड बिस्ट निर्माताका रूपमा छन् भने प्रेम पुरी सह-निर्माता हुन् ।
