‘कबड्डी’को पहिलो र दोस्रो श्रृंखलामा ‘मैयाँ’को भूमिकामा अभिनय गरेकी अभिनेत्री रिश्मा गुरुङ करिब ५ वर्षपछि फिल्म ‘रिमै’बाट कमब्याक गर्दैछिन् । यसमा उनको जोडी ‘कबड्डी’ श्रृंखलाकै अभिनेताद्वय दयाहाङ राई र सौगात मल्लसँग बाँधिनेछ । यो फिल्ममा काम गर्न उनी अमेरिकाबाट आइतबार काठमाडौं आइपुगेकी छन् । विवाहपछि रिश्मा श्रीमानसँग अमेरिकामा बस्दै आएकी छन् ।
उनलाई त्रिभुवन अन्तर्राष्ट्रिय विमानस्थलमा फिल्मका निर्देशक खिलबहादुर गुरुङ र निर्माता वीरबहादुर घलेले स्वागत गरेका थिए । रेश्माले लामो समयपछि फिल्ममा फर्किन आफू उत्साहित रहेको बताएकी छन् । ‘गुरुङ संस्कार र संस्कृतिमा आधारित रहेर ‘रिमै’ बन्न लागेकाले म काम गर्न तयार भएकी हुँ । दयाहाङ दाई र सौगात दाईसँग फेरि एकसाथ काम गर्न उत्साहित छु,’ उनले भनिन् ।
फिल्मको दशैं सकिएपछि असोज २८ गतेबाट गोरखाको सिरानचोक गाँउपालिकाबाट छायांकन सुरु गरिने निर्देशक गुरुङले बताए । असोज १७ गते घटस्थापनामा फिल्मको मुहूर्त गरिँदैछ । कविता आले र माओत्से गुरुङको पनि अभिनय रहने फिल्ममा ‘जारी’ र ‘मनसरा’ फेम्ड निर्देशक उपेन्द्र सुब्बाको लेखन रहेको छ । ‘कबड्डी’ जोडी दोहोरिएकाले ‘रिमै’ सफल हुन सक्ने धेरैको प्रक्षेपण छ ।
