यही कात्तिक ३० गतेबाट प्रदर्शनमा आउन लागेको फिल्म ‘मिसिङः केटी हराएको सूचना’को टिजरदेखि ट्रेलरसम्म सार्वजनिक भइसकेका छन् । अब प्रदर्शनका लागि तयारी अवस्थामा रहेको फिल्मको छायांकन भने अझै सकिएको छैन । बुधबारबाट फिल्मको एक गीत खिच्न थालिएको छ । ‘सपनीमा’ बोलको गीत ललितपुरको चापागाउँ क्षेत्रमा छायांकन भइरहेको छ ।

बिहीबारसम्म गीत खिचिने निर्देशक दीपेन्द्र गौचनले जानकारी दिए । यो गीत फिल्मको कथावाचनमा महत्त्वपूर्ण रहेकाले छायांकन गरिएको उनको भनाई छ । इन्दिरा जोशी र करण परियारको स्वर तथा करुण थापाको शब्द र संगीत रहेको रोमान्टिक भावको गीतमा फिल्मका मुख्य अभिनेता नाजिर हुसेन र अभिनेत्री सृष्टि श्रेष्ठले अभिनय गरिरहेका छन् । भिडियोमा मानकृष्ण महर्जनको छायांकन तथा रामजी लामिछानेको कोरियोग्राफी छ ।

फिल्ममा निर्देशक गौचन स्वयंको लेखन तथा निर्माण छ । यसमा नाजिर र सृष्टिसँगै सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र लगायतको अभिनय छ भने अमितेष शाह विशेष भूमिका छन् । नकिम उद्दिन कार्यकारी निर्माता रहेको फिल्ममा अमर महर्जनको डीओपी, निमेष श्रेष्ठको सम्पादन तथा शंकर महर्जनको द्वन्द्व निर्देशन छ ।