आगामी मंसिर ७ गतेबाट प्रदर्शनको तयारीमा रहेको फिल्म ‘तेल भिसा’का निर्देशक शंकर घिमिरे र अभिनेत्री तथा निर्मात्री ऋचा घिमिरेविरुद्ध ठगीको आरोपमा प्रहरीमा उजुरी परेको छ । अमेरिका लैजान्छु भन्दै ठगी गरेको आरोपमा उनीहरुविरुद्ध जिल्ला प्रहरी परिसर काठमाडौंमा उजुरी परेको हो । प्रहरीले उजुरी दिने व्यक्तिको नाम भने खुलाएको छैन ।
श्रीमान्-श्रीमती समेत रहेका शंकर र ऋचा एक दशकदेखि अमेरिकामा बस्दै आइरहेका छन् । उनीहरुले ‘तेल भिसा’ पनि अमेरिकामा छायांकन गरेका हुन् । यतिबेला उनीहरु फिल्म रिलिजका लागि नेपालमा छन् । प्रहरीमा परेको उजुरीको बारेमा ऋचा र शंकरले कुनै प्रतिक्रिया दिएका छैनन् ।
‘तेल भिसा’ शंकरको निर्देशनमा र ऋचाको अभिनयमा कमब्याक फिल्म हो । यसैले उनीहरु फिल्मलाई लिएर उत्साहित छन् । फिल्मले अमेरिका जाँदा नेपालीले भोग्नुपरेको कानुनी झमेलाको कथा उठाएको छ । अभिनेता विपिन कार्कीको दोहोरो भूमिका रहेको फिल्ममा वर्षा राउत, पूजा चन्द लगायतको पनि अभिनय छ ।
