सन् २०२१ को ब्लकबस्टर तेलुगु फिल्म ‘पुष्पा’को सिक्वेल यही मंसिर २० गते अर्थात् डिसेम्बर ५ बाट प्रदर्शनमा आउँदैछ । ‘स्योर सट ब्लकबस्टर’ मानिएको ‘पुष्पा २’को आइतबार ट्रेलर सार्वजनिक गरिएको छ । भारतको पटनास्थित गान्धी मैदानमा आयोजित भव्य समारोहबीच सार्वजनिक २ मिनेट ४८ सेकेण्ड लामो ट्रेलर धमाकेदार देखिन्छ । जसमा अभिनेता अल्लू अर्जुन हाबी छन् ।
रक्तचन्दन काठको व्यापारमा ठूलो साम्राज्य खडा गरेको पुष्पराज पात्र (अल्लू अर्जुन)को प्रहरीसँग भएको वारपारको लडाइँलाई ट्रेलरलाई जबर्जस्त रुपमा देखाइएको छ । प्रहरीको भूमिकामा रहेका अभिनेता फहाद फासिलले अल्लूलाई टक्कर दिएका छन् । विशेषगरी एक्सनलाई प्राथमिकता दिइएको ट्रेलरमा अल्लू अर्जुनको स्टाइल, गेटअप र डाइलग बुलन्द छ ।
सुकुमारको निर्देशन तथा लेखनमा तयार भएको फिल्ममा अल्लू र फहादसहित रश्मिका मन्दाना, सुनिल बर्मा, धनन्जय, जगपति बाबू, अनसुया भारद्वाज लगायतको अभिनय छ । ५ सय करोड भारुमा निर्माण भएको फिल्मले प्रदर्शन अगावै विभिन्न राइट्सबाट लगानी सुरक्षित गरिसकेको छ । ‘पुष्पा २’को हाइप हेर्दा यसले विश्वभर १५ सय करोडको आँकडा नघाउने प्रक्षेपण गरिएको छ ।
पटनामा आयोजित ट्रेलर सार्वजनिक कार्यक्रममा अल्लू र रश्मिका उपस्थित भएका थिए । निःशुल्क प्रवेशको व्यवस्था गरिएको कार्यक्रममा करिब ३ लाख दर्शक सहभागी भएको भारतीय मिडियाले जनाएका छन् । ‘पुष्पा २’को ट्रेलर रिलिजका लागि भोजपुरी र बलिउड फिल्मको दबदबा मानिने बिहार रोज्नुलाई अर्थपूर्ण रुपमा हेरिएको छ । हिन्दी फिल्मको ‘मास अडियन्स’लाई आकर्षित गर्न निर्माताले यो कदम उठाएको बताइन्छ ।
