यही मंसिर १४ गतेबाट प्रदर्शनमा आउने तयारीमा रहेको फिल्म ‘सत्या’को ट्रेलर सार्वजनिक गरिएको छ । आइतबार काठमाडौंमा एक कार्यक्रमका बीच सार्वजनिक साढे २ मिनेट लम्बाईको ट्रेलरमा प्रेम र एक्सनको मिश्रण देखिन्छ । पात्रहरुबीच टेण्डर हत्याउन भएको टकरावलाई ट्रेलरमा प्रस्तुत गरिएको छ ।
मिलन आले मगरको निर्देशनमा बनेको फिल्ममा राज कालाखेती, प्रिया शर्मा, करणसिंह बोहरा, विकास थापा मगर, वर्षा थिङ, सुमन खत्री, तेजा ऐर, ममता पौडेल लगायतको अभिनय छ । विकास थापा मगर फिल्मका प्रस्तुतकर्ता हुन् । ट्रेलर रिलिज कार्यक्रममा उनले ‘सत्या’ भरपूर रोमाञ्चक र मनोरञ्जक बनेको दाबी गरे ।
‘सत्या’को निर्मातामा सुमन खत्री र झुम्कादेवी कालाखेती छन् । यसमा सुमनकुमार तण्डुकारको छायांकन, श्रवण सम्राटको लेखन, विकास चौधरीको संगीत, रामजी लामिछाने, सुरेश पाण्डे र सुरेन बसेलको कोरियोग्राफी तथा तारा थापा ‘किम्भे’को सम्पादन छ ।
