२०६६ सालमा प्रदर्शनमा आएको फिल्म ‘सिलसिला’ले ठूलो व्यावसायिक सफलता हासिल गरेको थियो । केही हलमा ८६ दिन त केहीमा १ सय २५ दिनसम्म फिल्म चलेको थियो । र, यसमा समावेश ‘सागरसरी’ बोलको गीत उतिक्कै लोकप्रिय बनेको थियो । अब एकपटक फेरि ‘सिलसिला’ शीर्षकमा फिल्म निर्माण हुने भएको छ । नरेश पौड्यालको निर्देशनमा फिल्म बन्न लागेको हो ।
आगामी माघ २१ गते चितवनमा शुभ मुहूर्त गरेर फिल्मको छायांकन सुरु हुने निर्देशक पौड्यालले जानकारी दिए । उनका अनुसार, चितवन र मकवानपुर क्षेत्रमा ४५ दिनसम्म फिल्मको छायांकन हुनेछ । २०८२ सालमा रिलिज लक्ष्य राखिएको फिल्मलाई सूर्य श्रेष्ठले निर्माण गर्नेछन् । फिल्म एक्सन-लभस्टोरी कथामा निर्माण हुनेछ ।
फिल्ममा कलाकारहरु भने निश्चित भइसकेका छैनन् । अहिले केही कलाकारहरुसँग अन्तिम चरणको छलफल भइरहेको निर्देशक पौड्यालले बताए । उनका अनुसार, फिल्ममा नयाँ र चल्तीका कलाकारहरुको मिश्रण रहनेछ । तर, यसमा पहिलो ‘सिलसिला’का मुख्य अभिनेता विराज भट्ट र अभिनेत्री रेखा थापा भने हुने छैनन् । फिल्ममा निर्देशक पौड्याल स्वयंको लेखन रहेको छ ।
दुई वर्षअघि निर्देशक पौड्यालले ‘धड्कन २’ बनाउने घोषणा गरेका थिए । त्यसका लागि अभिनेत्री सञ्चिता लुइँटेलसहित अन्य केही कलाकारसँग सम्झौता समेत भइसकेको थियो । तर, अब यो फिल्मभन्दा अगाडि पौड्यालले ‘सिलसिला’ बनाउनेछन् । यो फिल्म रिलिजपछि ‘धड्कन २’ निर्माण गरिने उनले बताए । यसको स्क्रिप्ट तयार नै रहेको उनको भनाई छ ।
नरेश पौड्याल कुनै बेलाका सफल निर्देशक हुन् । उनको निर्देशनमा बनेका ‘हिरो’, ‘धड्कन’, ‘अभिमन्यू’ जस्ता फिल्म सफल मानिन्छन् । पछिल्लो पटक उनले सन् २०१० मा ‘दीप शिखा’ निर्देशन गरेका थिए । यसपछि उनी अभिनयमा बढी सक्रिय भए । अब ‘सिलसिला’बाट १४ वर्षपछि उनी निर्देशनमा फर्किँदैछन् । उनले दुई दर्जनभन्दा बढी फिल्ममा अभिनय गरिसकेका छन् ।
