अभिनेता विपिन कार्की र अभिनेत्री मिरुना मगरको शीर्ष भूमिका रहेको फिल्म ‘ऊनको स्वीटर’ आगामी बैशाख २६ गतेबाट प्रदर्शनमा आउने भएको छ । सोमबार एक क्यारेक्टर पोस्टर सार्वजनिक गर्दै निर्माताले प्रदर्शन मिति घोषणा गरेका हुन् ।
सार्वजनिक पोस्टरमा विपिन र मिरुनालाई प्रेमभावमा देख्न सकिन्छ । उनीहरु श्रीमान्-श्रीमतीको भूमिकामा रहेको पोस्टरले प्रष्ट पार्छ । उनीहरुबीच अन्तरजातीय विवाह भएको देखिन्छ । किनकि, पोस्टरमा समावेश दुई तस्वीरमध्ये एउटामा मिरुना गुरुङ पहिरनमा देखिएकी छन् । विपिन र मिरुनाले यसअघि फिल्म ‘लालपूर्जा’मा एकसाथ काम गरेका थिए ।
नवीन चौहानको डेब्यु निर्देशनमा तयार भएको फिल्ममा विपिन र मिरुनासहित सुनिल पोखरेल, माओत्से गुरुङ, विल्सन विक्रम राई, प्रेम सुब्बा, एलेक्स पारस, परीक्षा लिम्बु, सुरज तमू, शारदा देवी सिलवाल लगायतको अभिनय छ । आर्टमाण्डूले फिल्मको निर्माण गरेको हो । यो कम्पनीले निर्माण गरेका ‘बाफ’, ‘तीनपाते’, ‘के माया लाग्छ र ?’, ‘सुनाखरी’ जस्ता गीत लोकप्रिय छन् ।
फिल्ममा निर्देशक चौहान स्वयंको लेखन छ भने उनलाई सुरज कटुवालले सघाएका छन् । छायांकनमा जानुअघि फिल्मको ‘फूल’ बोलको गीत सार्वजनिक गरिएको थियो, जसलाई युट्युबमा निकै रुचाइएको छ । ९ महिनामा १ करोड ४० लाखले हेरिसकेको यो गीतमा संगीत र स्वर सुजन चापागाईँको छ भने हर्क साउदको शब्द रचना छ । यो गीतकै कारण फिल्मको राम्रो हाइप बनेको छ ।
