गत वर्षको ब्लकबस्टर फिल्म ‘टुवेल्थ फेल’मा गरेको जीवन्त अभिनयका कारण चर्चामा आएका अभिनेता विक्रान्त मेस्सीले आफ्ना प्रशंसकलाई निराश तुल्याउने एउटा निर्णय गरेका छन् । अब उनले अभिनयबाट विश्राम लिने भएका छन् । आइतबार मध्यरातमा इन्स्टाग्राममा एक पोस्ट गर्दै उनले २०२५ मा अन्तिमपटक फिल्ममार्फत् दर्शकसँग भेट्ने जनाएका छन् ।
उनी लेख्छन्, ‘गएको केही वर्ष र त्यसपछिका वर्ष सानदार रह्यो । मलाई दिनुभएको निरन्तरको समर्थनप्रति आभारी छु । तर, म जब-जब अगाडि बढ्छु, तब मलाई महसुस हुन्छ कि अब आफैंलाई फेरि सन्तुलित गर्न र घर फर्किने समय आएको छ । एक पति, पिता, छोरा र अभिनेताको रुपमा पनि । यसैले अब २०२५ मा हामी अन्तिमपटक मिल्नेछौं, जबसम्म समय सही हुँदैन ।’
यतिबेला विक्रान्तको पाइपलाइनमा दुई फिल्म छन्, ‘यार जिगरी’ र ‘आँखों की गुस्ताखियाँ’ । यी दुवै फिल्म आगामी वर्ष २०२५ मा रिलिज हुनेछन् । यसपछि उनले अभिनयबाट विश्राम लिनेछन् । विक्रान्तले अभिनय छाड्न लागेको विषयले उनका प्रशंसकमा ठूलै हलचल मच्चाएको छ । धेरैले यो निर्णय फिर्ता दिन आग्रह गरेका छन् । उनको निर्णयले सेलिब्रेटीहरु समेत आश्चर्यमा परेका छन् ।
विक्रान्तले २०१३ मा आएको फिल्म ‘लुटेरा’बाट बलिउडमा डेब्यु गरेका थिए । यसपछि उनले ‘दिल धडकने दो’, ‘छपाक’, ‘हसीन दिलरूबा’ जस्ता फिल्ममा काम गरे । उनलाई ठूलो लोकप्रियता भने ‘टुवेल्थ फेल’ले दिलायो । यतिबेला हलमा उनी अभिनीत फिल्म ‘द साबरमती रिपोर्ट’ प्रदर्शनरत छ, जसले बक्स अफिसमा राम्रो कमाई गरिरहेको छ ।
