म्यूजिक भिडियो हुँदै फिल्म ‘लज्जा’बाट डेब्यु गरेकी अभिनेत्री शिल्पा पोखरेलको केही वर्ष करिअर सन्तुलित नै रह्यो । ‘हवल्दार सुन्तली’, ‘किस्मत २’, ‘मंगलम’ जस्ता फिल्म सफल हुँदा उनलाई कामको अभाव भएन । तर, पूर्वपति तथा निर्माता छविराज ओझासँगको कानुनी झमेलापछि भने उनको करिअर एकाएक सुस्ताएको छ । फिल्ममा त उनी नदेखिएकै ५ वर्ष भइसकेको छ ।

उनी पछिल्लो पटक फिल्म ‘भिलेन’ (२०१९)मा देखिएकी थिइन् । यो फिल्म बक्स अफिसमा नराम्रोसँग पिटियो । यसपछि उनले फिल्म ‘आर्या’मा काम गरिन्, जुन प्रदर्शनमा नै आएको छैन । यसपछि उनले कुनै पनि फिल्म गरेकी छैनन् । अझ भनौं, उनी फिल्मविहीनको अवस्थामा छिन् । यद्यपि, म्यूजिक भिडियो भने उनले निरन्तर गर्दै आइरहेकी छन् ।

नेपाली फिल्मबाट अफर टुटेको भए पनि शिल्पालाई भोजपुरी फिल्म निरन्तर हातमा पर्दै आइरहेको छ । ‘प्रेमगीत २’, ‘जय शम्भो’, ‘वान म्यान आर्मी’ जस्ता भोजपुरी फिल्ममा काम गरिसकेकी उनको पाइपलाइनमा अझै दुईवटा फिल्म छन् । उनी चाँडै ‘पुलिस स्टोरी’ फिल्मका लागि क्यानडा जाने तयारीमा छिन् । उनको अर्को फिल्मको छायांकन पनि क्यानडामा नै हुने जनाइएको छ ।

यसरी हेर्दा अब शिल्पाले भोजपुरी फिल्ममा आफ्नो करिअर बनाउन खोजेको देखिन्छ । एकपछि अर्को फिल्म हातमा पर्नुले पनि उनलाई भोजपुरीमा स्थापित हुन थप सहज बनाएको छ । तर, नेपाली फिल्ममा भने उनको कमब्याक अनिश्चित छ । यो अवस्थामा ‘आर्या’ रिलिज भएको खण्डमा उनलाई ठूलो राहत हुनसक्छ । उनको पखाई पनि यही फिल्मलाई लिएर देखिन्छ ।