लभस्टोरीमा एउटा यादगार फिल्म मानिन्छ, ‘प्रेम गीत’ । यसको तेस्रो श्रृंखला समेत निर्माण भइसकेको छ । अब यही नामजस्तै मिल्दोजुल्दो लाग्ने ‘प्रेम गीता’ नाममा नयाँ फिल्म बन्ने भएको छ । सोमबार पाँचखालबाट फिल्मको छायांकन सुरु गरिएको छ ।
राजेन्द्र बस्नेतले निर्देशनको जिम्मेवारी सम्हालेको फिल्ममा सुशील पोखरेल, जान्ह्वी बस्नेत, अर्जुन गुरुङ (भँगेरी डन), साजिद खान, आशा पौडेल, दीपक केसी, खुश्बु पाण्डे, माधव केसी, मानसी शर्मा, दीपशन लिम्बू, मौसम खड्का, ममता माझी लगायतको अभिनय रहनेछ । फिल्म प्रेमकथामा बन्न लागेको शीर्षकले नै प्रष्ट हुन्छ ।
ग्रीन प्यारोटस् फिल्म प्रोडक्सनको ब्यानरमा निर्माण हुने फिल्मको निर्माता अयाज अली खान हुन् । साजिद खान प्रस्तुतकर्ता रहेको फिल्मको छायांकन काठमाडौं र काभ्रे क्षेत्रमा २५ दिनसम्म हुने निर्देशक बस्नेतले बताए । यसमा मौनता श्रेष्ठको लेखन रहेको छ भने रामेश्वर हुँमागाईको छायांकन, भरत बस्नेतको संगीत, राजु किराँतको द्वन्द्व तथा रामजी लामिछानेको कोरियोग्राफी रहनेछ ।
