निर्माता सरोज न्यौपाने आफ्नो पछिल्लो फिल्म ‘ग्याङस्टर ब्लूज’ (२०१७)ले व्यावसायिक सफलता हासिल गर्न नसकेपछि करिब ६ वर्ष निर्माणबाट टाढा देखिए । अब भने उनी लगातार फिल्म निर्माण गर्न कसिएका छन् । यतिबेला उनको नयाँ फिल्म ‘जेरी अन टप’ फ्लोरमा छ । यसलाई आगामी जेठमा रिलिजको तयारी गरिएको छ ।

‘जेरी अन टप’को छायांकन नसकिँदै निर्माता न्यौपानेले अर्को फिल्मको घोषणा गरेका छन् । सोमबार उनले एक पोस्टरमार्फत् ‘फनफनी घुमेर’को निर्माण घोषणा गरेका हुन् । उनका अनुसार फिल्मलाई आगामी दशैंको फूलपातीमा रिलिज गरिनेछ । उनले कलाकार र निर्देशकको नाम भने सार्वजनिक गरेका छैनन् । फिल्ममा अहिलेका चल्तीका कलाकार रहने उनको भनाइ छ ।

यतिबेला फिल्मको स्क्रिप्ट लेखनको काम भइरहेको छ । आगामी फागुन अन्तिम वा चैत पहिलो साताबाट फिल्मको छायांकन सुरु हुन सक्ने निर्माता न्यौपानेले बताए । अनन्या फिल्म्सको प्रस्तुति रहने फिल्मको निर्मातामा भविष्य खडका पनि छन् । शीर्षकबाटै फिल्म कमेडी विषयवस्तुमा बन्न लागेको प्रष्ट हुन्छ ।

‘फनफनी घुमेर’सहित अब आगामी दशैंमा रिलिज हुने फिल्मको संख्या आधा दर्जन पुगेको छ । यसअघि ‘महाराजधिराज’, ‘माइतीघर’ र ‘परालको आगो’ले दशैंलाई प्रदर्शन मिति घोषणा गरिसकेका छन् भने अशोक शर्मा र विराज भट्ट पनि आगामी दशैंमा आफ्नो नयाँ फिल्म रिलिज गर्ने तयारीमा छन् । अब यीमध्ये कुन-कुन फिल्म लाखापाखा लाग्छन्, त्यो हेर्न बाँकी छ ।