भ्यालेनटाइन डेको दिन पारेर आगामी फागुन २ गतेबाट प्रदर्शनमा आउन लागेको दीपेन्द्र लामा निर्देशित फिल्म ‘दुःखी आत्मा’को फर्स्टलुक पोस्टर सार्वजनिक गरिएको छ । सोमबार सार्वजनिक तीनवटा पोस्टरले पात्रहरुको मुड दर्शाउँछ । एउटा पोस्टरमा अभिनेता दयाहाङ राई र अभिनेत्री आँचल शर्मा रोमान्टिक देखिएका छन् । जसमा दयाहाङले आँचलको निधारमा चुमेका छन् ।

अन्य दुईमध्ये एक पोस्टरमा दयाहाङले हेडफोन लगाएर मोबाइलमा केही हेरिरहेको देखिन्छ । तेस्रो पोस्टरमा भने दयाहाङ र आँचलसहित अनुप विक्रम शाही, बुद्धि तामाङ, अशान्त शर्मा, लोकेन्द्र लेखक र रेअर राई पनि चित्रित छन् । तीनवटा पोस्टरले फिल्मप्रति दर्शकमा उत्सुकता जगाउनेमा निर्माण टिम विश्वस्त छ ।

निर्देशक लामा स्वयंको लेखन रहेको फिल्मलाई हिमाल कडरियाले निर्माण गरेका हुन् । यसअघि दीपेन्द्र र हिमालबीच हिट फिल्म ‘नाङ्गो गाउँ’मा सहकार्य भएको थियो । दीपेन्द्रले ‘छ माया छपक्कै’, ‘घामपानी’, ‘२ नम्बरी’ र ‘गोपी’ जस्ता फिल्म निर्देशन गरिसकेका छन् । ‘दुःखी आत्मा’ उनको छैटौँ निर्देशित फिल्म हो । उनी पत्रकारिता पृष्ठभूमिका हुन् ।

क्लक वर्क कृएसनको ब्यानरमा निर्माण भएको फिल्मको कार्यकारी निर्मातामा सुदीप ढकाल छन् । दीया मास्केको पनि महत्त्वपूर्ण भूमिका रहेको फिल्ममा चर्चित कवि श्रवण मुकारुङले विभिन्न शीर्षकमा तयार पारेको १० वटा कविता समेटिएको छ । त्यसलाई फिल्ममा दयाहाङको पात्रमाथि फिल्मांकन गरिएको छ । आलोक शुक्लाले खिचेको फिल्मलाई निमेष श्रेष्ठले सम्पादन गरेका छन् ।