.jpeg)
आगामी फागुन महिनामा फिल्म रिलिजको चाप देखिने भएको छ । आधा दर्जनभन्दा बढी फिल्म यही महिना रिलिजको तयारीमा छन् । यसैबीच, भ्यालेनटाइन डेको अवसर पारेर फागुन २ गते फिल्म ‘रंगी’ प्रदर्शनमा आउने भएको छ । बुधबार फर्स्टलुक पोस्टर सार्वजनिक गर्दै फिल्मको प्रदर्शन मिति घोषणा गरिएको हो । यो मितिमा अर्को फिल्म ‘दुःखी आत्मा’ पनि प्रदर्शनको तयारीमा छ ।
सार्वजनिक पोस्टरमा अभिनेता सलोन बस्नेत र बाल कलाकार आयुषी ढकाल मात्र चित्रित छन् । उनीहरुलाई गम्भीर भावमा देख्न सकिन्छ । दुवैको आँखाबाट आँशु बगेको छ । पोस्टरको पृष्ठभूमिमा भने ग्रामीण भेगको बजार देखिन्छ । फिल्ममा सलोन र आयुषी बाबु-छोरीको भूमिकामा छन् । उनीहरुको भावनात्मक सम्बन्धको कथा फिल्मले भन्ने जनाइएको छ ।
सुरेश न्यौपानेको डेब्यु निर्देशनमा तयार भएको फिल्ममा सलोन र आयुषीका साथै ‘मिस वर्ल्ड नेपाल २०२०’की विजेता नम्रता श्रेष्ठ पनि मुख्य भूमिकामा छिन् । उनले यही फिल्मबाट अभिनेत्रीको रुपमा डेब्यु गरेकी हुन् । यसमा दीलिप रायमाझी, उत्तम केसी, सुमिन गुरुङ र विशाल पहारीको पनि अभिनय रहेको छ । फिल्मको अष्ट्रेलियामा प्रिमियरको तयारी भइरहेको जानकारी प्राप्त छ ।
सलोन स्वयं प्रस्तुतकर्ता रहेको फिल्ममा सक्षम सुवेदी र करिश्मा केसी निर्मातामा छन् । सान्भी इन्टरटेनमेन्टको ब्यानरमा निर्माण भएको फिल्ममा सुमन गजमेरको स्क्रिप्ट लेखन, सौरभ लामाको छायांकन, दुर्गेश थापा, आमेश भण्डारी र भीम बिसीको संगीत, बन्दे प्रसादको सम्पादन, राजेन्द्र मोक्तानको कलर तथा कविराज गहतराज र शिशिर खातीको कोरियोग्राफी रहेको छ ।
