केही दिनअघि आर्टमाण्डू युट्युब च्यानलबाट फिल्म ‘ऊनको स्वीटर’मा समावेश ‘मखमली’ गीतको सानो अंश सार्वजनिक गरिएको थियो, जुन यतिबेला धेरै दर्शकको मुखमा झुण्डिएको छ । गीतको सानै अंशमा पनि सयौं टिकटक र रिल्स बनेका छन् । यसैबीच, यो गीतको पूरा अंश बिहीबार सार्वजनिक गरिएको छ । आठ मिनेट लम्बाईको गीतलाई मेलाको परिवेशमा तयार पारिएको छ ।
कौडा भाकामा आधारित गीतले फिल्मका मुख्य अभिनेता विपिन कार्की र अभिनेत्री मिरुना मगरबीचको अव्यक्त प्रेम व्यक्त गर्छ, जो फरक जातीय पृष्ठभूमिका हुन् । सुजन चापागाईँ र सुनिता थेगिमको स्वर रहेको गीतमा हर्क साउदको शब्द र सुजनकै संगीत छ । यसका संगीत निर्माता कोविद बज्र हुन् । गीतको अडियोमा दर्शकलाई मन्त्रमुग्ध बनाउन सक्ने शक्ति छ ।
दीप गुरुङको कोरियोग्राफीमा तयार भएको गीतको भिडियोमा अभिनेता विल्सन बिक्रम राई पनि प्रस्तुत छन् । उनी मिरुनासँग नाच्दै गर्दा विपिन निराश देखिन्छन् । यसले मिरुनाप्रति उनको प्रेम दर्शाउँछ । मीठासपूर्ण शब्द र सुजनको जादुयी स्वरले गीतमा ज्यान भर्ने काम गरेको छ । गीत रिलिज भएसँगै युट्युबमा सुजनको स्वरको दर्शकहरुले मुक्तकण्ठले प्रशंसा गरिरहेका छन् ।
आगामी बैशाख २६ गतेबाट सार्वजनिक प्रदर्शनमा आउन लागेको फिल्मलाई नवीन चौहानले निर्देशन गरेका हुन् । यो उनको पहिलो निर्देशकीय फिल्म हो । यसअघि उनले ‘घुमी घुमी’, ‘तीन पाते’, ‘फूलथुङ्गे रानी’ जस्ता म्यूजिक भिडियो निर्देशन गरिसकेका छन् । फिल्ममा विपिन, मिरुना र विल्सनसहित सुनिल पोखरेल, माओत्से गुरुङ, प्रेम सुब्बा, एलेक्स पारस, परीक्षा लिम्बू, सुरज तमू, शारदा देवी सिलवाल लगायतको अभिनय छ ।
फिल्मलाई निर्देशक चौहानले नै लेखेका हुन् भने उनलाई लेखनमा सुरज कटुवालले सघाएका छन् । यसमा चिन्तन राजभण्डारीको छायांकन तथा कृष्ण भण्डारीको सम्पादन छ । आर्टमाण्डूको निर्माण रहेको फिल्मको कार्यकारी निर्माता सागर बुढाथोकी र मिलन खत्री हुन् । फिल्ममा समावेश गीतहरुमा सुजन चापागाईँसहित झुमा लिम्बू, सुनिता थेगीम र सलिना बि.क.ले स्वर दिएका छन् ।
