भारतीय फिल्म उद्योगका लागि वर्ष २०२४ सुखद् नै रहन पुग्यो । ठूला बजेटका बलिउड फिल्मले अपेक्षित व्यापार गर्न नसकेको भए पनि साना बजेटका फिल्मले उत्कृष्ट कमाइ गरे । केही साउथ फिल्मले पनि बक्स अफिस राम्रैसँग तताए । ‘स्त्री २’ र ‘पुष्पा २’को चमत्कारी व्यापार यस वर्षको सबैभन्दा ठूलो उपलब्धिको रुपमा रह्यो । ‘पुष्पा २’ले त हिन्दी भर्सनमा इतिहास नै रचेको छ ।
६० करोडमा बनेको ‘स्त्री २’ले विश्वव्यापी ८७४ करोड व्यापार गर्यो । यसले भारतमा मात्र ६२७ करोडमाथि व्यापार गर्दै सबैभन्दा धेरै कमाउने हिन्दी फिल्मको कीर्तिमान बनाएको थियो । अब यो रेकर्ड ‘पुष्पा २’को नाममा बनेको छ । यसले हिन्दी भर्सनमा ७७० करोड नेट कमाइ गरिसकेको छ भने भारतभर ११ सय करोड र विश्वव्यापी १७ सय करोड कमाएको छ ।
२०२४ मा धेरै कमाउने भारतीय फिल्म ‘कल्की’ (तेलुगु) पनि हो, जसले भारतमा हिन्दी भाषामा २२७ करोड, भारतभर ६४० करोड र विश्वव्यापी ११ सय करोड कमायो । दक्षिण भारतीय फिल्महरु ‘द ग्रेटेस्ट अफ अल टाइम’ (२५२ करोड), ‘देवरा’ (२४९ करोड), ‘अमरन’ (२१६ करोड), ‘हनुमान’ (२०१ करोड) र ‘मन्जुम्मेल ब्वाइज’ (१६७ करोड) पनि व्यावसायिक रुपमा सफल ठहरिए ।
बलिउडमा भने यस वर्ष साना बजेटका फिल्मले करोडौं छापे । ३० करोडमा बनेको हरर कमेडी फिल्म ‘मुन्ज्या’ले भारतमा १२७ करोड कमायो । ५ करोडमा निर्माण भएको ‘लापता लेडीज’ले १७ करोड छाप्यो । ६० करोडमा बनेको ‘शैतान’ले १ सय ५० करोड कमायो । २० करोडमा बनेको ‘आर्टिकल ३७०’ पनि सफल रह्यो । यसले एक सय करोडमाथि कमाइ गर्यो ।
‘भूल भूलैयाँ ३’ पनि २०२४ को सुपरहिट बलिउड फिल्म हो, जसले भारतमा २७८ करोडमाथि कमायो । ‘सिंघम अगेन’को कमाइ भने २६७ करोड रह्यो । २५० करोडमा बनेको ‘फाइटर’ले पनि सन्तोषजनक कमाइ गर्यो । यसले भारतमा २४४ करोड नेट कमाएको जनाइएको छ । ‘किल’ (४७ करोड), ‘विक्की विद्याका वो वाला भिडियो’ (४४ करोड) पनि यस वर्ष सफल रहे ।
२०२४ मा बलिउड र साउथका केही ठूला बजेटका फिल्म भने पत्तासाफ भए । ३५० करोड लागतको बलिउड फिल्म ‘बडे मियाँ छोटे मियाँ’ले एक सय करोड कमायो । २५० करोडमा बनेको ‘मैदान’ ६३ करोडमा समेटियो । वर्षको अन्तिम फिल्मको रुपमा रिलिज भएको ‘बेबी जोन’ पनि टाँट पल्टिने देखिन्छ । १८० करोडमा बनेको फिल्मलाई ५० करोड कमाउन पनि धौधौ परेको छ ।
दक्षिण भारततर्फ भने यस वर्ष अभिनेता सूर्या अभिनीत फिल्म ‘कंगुवा’ सबैभन्दा ठूलो डिजास्टर बन्न पुग्यो । ३५० करोडमा बनेको फिल्मले विश्वव्यापी ७० करोड मात्र जोड्न सक्यो । ‘इन्डियन २’, ‘मिस्टर बच्चन’, ‘डबल स्मार्ट’, ‘अपरेसन भ्यालेनटाइन’, ‘द फेमिली स्टार’ जस्ता ठूला बजेटका दक्षिण भारतीय फिल्म पनि बक्स अफिसमा नराम्रोसँग पिटिए ।
यस वर्ष बलिउडका तीन ठूला सुपरस्टार सलमान खान, शाहरुख खान र आमिर खानका कुनै फिल्म रिलिज भएनन् । सलमानले केमियो गरेका ‘सिंघम अगेन’ र ‘बेबी जोन’ भने रिलिज भएका थिए । आगामी वर्ष तीनै स्टारको फिल्म प्रदर्शन हुनेछन् । यसैले २०२५ मा ठूलो व्यापार हुनसक्ने अनुमान छ । बलिउडमा २०२४ लाई स्टार र बजेटभन्दा पनि कन्टेन्ट विकेको वर्ष मानिएको छ ।
