‘हैट’ उपनामले परिचित कलाकार बुद्धि तामाङ अब निर्माता बन्ने भएका छन् । फिल्म ‘कुस्ती’बाट उनी निर्माणमा होमिन लागेका हुन् । गुरूङ समुदायको महान चाड तमु ल्होसारको दिन पारेर पोस्टरमार्फत् फिल्मको निर्माण घोषणा गर्दै कलाकारबारे जानकारी गराइयो । फिल्ममा अभिनेता धीरज मगर र अभिनेत्री मिरुना मगरको मुख्य भूमिका रहनेछ । यो उनीहरुको पहिलो सहकार्य हो ।

सार्वजनिक पोस्टरमा धीरज र मिरुनालाई देख्न सकिन्छ । लाइट ग्रीन र लाइट पिङ्कको प्रयोग गरिएको पोस्टरमा धीरज लाइट पिङ्क ड्रेसमा सोफाको एक भागमा बसेका छन् । मिरुना भने लाइट ग्रीन ड्रेसमा सोफाको अर्को भागमा बसेकी छन् । धीरज हँसिलो भावमा छन् । मिरुना निराश देखिन्छिन् । अलग स्वभावका दुई पात्रको प्रेमकथामा फिल्म बन्ने पोस्टरले संकेत गर्छ ।

अनिल योञ्जनको लेखन तथा निर्देशनमा बन्न लागेको फिल्ममा बुद्धि तामाङको पनि महत्त्वपूर्ण भूमिका रहनेछ । अनुषा सिनेमावुड पिक्चर्सको प्रस्तुति रहने फिल्मको प्रदर्शन हुने वर्ष र महिना पनि सार्वजनिक गरिएको छ । पोस्टरमा फिल्म अर्को वर्ष अर्थात् २०८२ को भदौमा रिलिज हुने उल्लेख छ । आगामी फागुनपछि फिल्मको छायांकन सुरु हुनेछ ।

निर्देशक योञ्जनले एकअर्कालाई धेरै माया गर्ने एक जोडीको प्रेमकथामा फिल्म बन्ने जानकारी दिए । उनी भन्छन्, ‘उनीहरु माया त गर्छन् तर आ-आफ्नो स्वभावले गर्दा कठिनाइको सामना पनि गरिरहेका छन् । दर्शकले यो जोडीबाट गर्ने अपेक्षालाई साकार पार्न हाम्रो प्रयास रहनेछ ।’ एकअर्काबाट छुटिन नसक्ने र सँगै रहन पनि नसक्ने जोडीको प्रेमकथा नै ‘कुस्ती’ रहेको उनी प्रष्ट पार्छन् ।