आगामी माघ १६ गते (शहिद दिवस)देखि प्रदर्शनको तयारीमा रहेको फिल्म ‘एक्टर : टेक वान’को मुख्य भूमिकामा दुई पुस्ता छन्, राजबल्लभ कोइराला र प्रदीप खड्का । राजबल्लभ दशकअघिका ‘स्टार’ हुन् । उनीपछि उदाएको पुस्तामा प्रदीप पर्छन् । यसैले उनीहरुलाई पहिलो पटक एकसाथ पर्दामा हेर्न दर्शक अधैर्य छन् । ‘को हिरो र को भिलेन’ भन्ने कौतुहलता पनि उतिक्कै देखिन्छ ।
फिल्म रिलिजका लागि अब एक महिना बाँकी रहँदा निर्माण टिमले प्रचारमा तीव्रता दिन थालेको छ । जसअनुरुप सोमबार दुईथान पोस्टर सार्वजनिक गरियो, जसले पात्रहरुको मुड दर्शाउँछ । एक पोस्टरमा राजबल्लभ र प्रदीप चित्रित छन् । प्रदीपको अनुहारमा चोट देखिन्छ । राजबल्लभ भने सिगार तान्दै प्रदीपको फोटो नियालिरहेका छन् । यसले कथामा शक्तिको खेल रहेको संकेत गर्छ ।
अर्को पोस्टरमा राजबल्लभ रिसाहा भावमा प्रस्तुत छन् । एक हातमा सल्किरहेको सिगार छ । र, उनले कसैलाई चुनौती दिइरहेको देखिन्छ । पोस्टरमा प्रदीप पनि चित्रित छन् । उनलाई चकलेटी अवतारमा प्रस्तुत गरिएको छ । उनीसहित दुई शीर्ष अभिनेत्री आना शर्मा र दिव्या रायमाझीलाई पनि पोस्टरमा देख्न सकिन्छ । यसबाट पात्रहरुबीचको सम्बन्धको आयामलाई बुझाउन खोजिएको छ ।
राजन भुसालको निर्देशनमा बनेको यस फिल्ममा दिव्य देव, उषा रजक, सुशील सिटौला, सिर्जना अधिकारी, बादल भट्ट लगायतको पनि अभिनय छ । आकाश बराल र निर्देशक भुसाल स्वयंको लेखन रहेको फिल्ममा थमन कुमार भण्डारी निर्माता र अनीश भुसाल सह-निर्मातामा छन् । फिल्मका छायाँकार नरेन्द्र मैनाली हुन् भने सम्पादन निमेष श्रेष्ठ तथा द्वन्द्व निर्देशन अष्ट महर्जनको रहेको छ ।
