आगामी फागुन १४ गते (महाशिवरात्रि)बाट प्रदर्शनमा आउन लागेको फिल्म ‘मायावी’को पहिलो गीत अंग्रेजी नयाँ वर्षको अवसरमा सार्वजनिक गरिएको छ । ‘त्यो माया हो’ बोलको रोमान्टिक भावको गीतमा फिल्मका मुख्य अभिनेता पल शाह र अभिनेत्री दीपिका प्रसाइँ प्रस्तुत छन् । गीतले उनीहरुको प्रेम र समर्पणको भाव बोलेको छ । भिडियोमा दुवैलाई रोमान्टिक मुडमा देख्न सकिन्छ ।
सफ्ट शैलीको गीतमा एसडी योगी र सदीक्षा कट्टेलको स्वर, राम अविरल विष्टको शब्द रचना तथा गायक योगी स्वयंको संगीत छ । गीतको भिडियोलाई कविराज गहतराजले कोरियोग्राफी गरेका हुन् । निर्देशक दीवाकर भट्टराईले फिल्ममा ‘त्यो माया हो’ गीत कथावाचनको रुपमा रहेको जनाएका छन् । फिल्मको हाइप निर्माणमा यो गीतले ठूलो भूमिका खेल्ने उनको विश्वास छ ।
निर्देशक भट्टराई स्वयंको लेखन रहेको फिल्ममा पल र दीपिकासहित प्रशान्त ताम्राकार, सुशील सिटौला, लक्ष्मी गिरी, राजाराम पौडेल, करिश्मा श्रेष्ठ, अन्शु महर्जन, रवि डंगोल, राम प्रसाईं, दीपेन्द्र सिम्खडा, संगीता सिलवाल लगायतको अभिनय छ । यो फिल्मबाट ‘म्यान हन्ट इन्टरनेशनल नेपाल २०१६’का विजेता समिम खानले डेब्यु गरेका छन् ।
‘मायावी’मा ध्रुव न्यौपाने, राज कटुवाल र चन्द्र पन्तको लगानी छ । प्रवीण भट्टराई र करण सिंह कार्यकारी निर्माता रहेको फिल्ममा मञ्जु भण्डारी, राजु पराजुली र सुमित ओली भने सह-निर्माताको रुपमा छन् । फिल्मको गीतमा एसडी योगीका साथै शम्भुजित बाँस्कोटाले पनि संगीत दिएका छन् । यसमा शाहिल खानको ट्रेलर, राजु विक्रम थापाको डीओपी तथा मिलन श्रेष्ठको सम्पादन छ ।
