बाल्यकालमै गायन कलाका कारण चर्चामा आएका अशोक दर्जीले अभिनयमा डेब्यु गर्न लागेको फिल्म ‘मन विनाको धन ठूलो कि धन विनाको मन’मा कलाकारको लाइनअप बलियो बनेको छ । गायक तथा संगीतकार टंक बुढाथोकीको निर्माण तथा निर्देशनमा बन्न लागेको फिल्ममा अशोक स्वयं मुख्य भूमिकामा देखिनेछन् भने मुख्य अभिनेत्रीमा नीता ढुंगानालाई अनुबन्धित गरिएको छ ।

सरोज खनाल, रमेश विश्वकर्मा, बुद्धि तामाङ, रवीन्द्र झा, एआर बुढाथोकी, शंकर श्रेष्ठ र साम्राज्ञी थापाको पनि फिल्ममा अभिनय रहने निर्देशक टंकले जानकारी दिए । फिल्ममा अझै केही कलाकार निश्चित हुन बाँकी रहेको उनको भनाइ छ । आगामी माघबाट छायांकन सुरु हुन लागेको फिल्ममा टंक स्वयंको कथा तथा शिवम् अधिकारीको पटकथा तथा संवाद लेखन छ ।

संगीतकार बुढाथोकीले यही फिल्मबाट निर्देशनमा डेब्यु गर्न लागेका हुन् । यसअघि उनले आफ्नै स्वर तथा संगीतमा रहेका केही गीतको भिडियो भने निर्देशन गरिसकेका छन् । फिल्मको गीत उनी आफैंले तयार पारेका छन् । छायांकन भने सौरभ लामाले गर्नेछन् । सामाजिक विषयवस्तुमा बन्न लागेको फिल्मलाई ब्यांकटेस इन्टरटेनमेन्टले वितरण गर्नेछ ।

‘मन विनाको धन ठूलो कि धन विनाको मन’ गायक दर्जीले बाल्यकालमै गाएको पहिलो गीत हो । ६ वर्षअघि रिलिज भएको यो गीत चर्चित बनेको थियो । युट्युबमा गीतलाई झन्डै तीन करोडले हेरिसकेका छन् । लामो समयदेखि संगीतकार बुढाथोकीकै संरक्षणमा रहेका अशोक अहिले काठमाडौंमा कक्षा ८ मा अध्ययनरत छन् । उनको आवाजमा गीत नआएको भने लामो समय भैसकेको छ ।