हरर-कमेडी जनरामा बनेको फिल्म ‘फिरफिरे फिरिरी’को ट्रेलर सार्वजनिक गरिएको छ । सोमबार चलचित्र विकास बोर्डको सभा हलमा एक कार्यक्रमका बीच सार्वजनिक झन्डै तीन मिनेट लम्बाईको ट्रेलरले कथावस्तुबारे महत्त्वपूर्ण खुलासा गर्छ । विभिन्न पेशा अंगालेका चार युवकको जीवनमा अचानक एक युवतीको आगमनपछि उत्पन्न परिस्थितिलाई हास्य शैलीमा प्रस्तुत गरिएको छ ।
ट्रेलर सार्वजनिक कार्यक्रममा निर्देशक नवीन भट्टले ‘फिरफिरे फिरिरी’ साइकोलोजिकल हरर-थ्रिलर फिल्म रहेको जानकारी दिए । हरर फिल्ममा पात्रहरु सेतो कपडामा देखिन्छन्, टाउको र खुट्टा उल्टो फर्किन्छ भन्ने बुझाइ भए पनि यसमा त्यो नरहेको उनले स्पष्ट पारे । मनोवैज्ञानिक रूपमा मानिस कसरी तर्सिन्छ भन्ने विषय फिल्मले उठाएको उनको भनाइ छ ।
आगामी माघ ४ गतेबाट सार्वजनिक प्रदर्शनमा आउने तयारीमा रहेको फिल्ममा सन्दीप श्रेष्ठ, भावना उप्रेती, रविना केसी, पिटर प्रिन्स, मनोजकुमार अधिकारी, शंकर सेढाई, सूर्यमान लिम्बूलगायतको अभिनय छ । फिल्मका निर्माता मनोजकुमार अधिकारी हुन् । उनले १५ वर्षपछि फिल्म निर्माण गरेका हुन् । उनले यसअघि ‘नौ डाँडा पारी’ र ‘मंगलसूत्र’ फिल्म निर्माण गरेका थिए ।
‘आज साइकल, भोलि फरारी’ ट्यागलाइन दिइएको फिल्ममा निर्देशक भट्ट र सन्दीप श्रेष्ठको लेखन रहेको छ भने जितु तामाङको छायाङ्कन, केशवराज भट्टको कोरियोग्राफी, प्रशान्त शिवाकोटीको संगीत तथा अनन्त घिमिरेको सम्पादन र कलर छ । बिन्दबासिनी क्रियसनको ब्यानरमा निर्माण भएको फिल्मका सह-निर्माता नितिश पुन हुन् । फिल्मको देशभर वितरण आरआर फिल्मस्ले गर्नेछ ।
