‘केजीएफ’का दुईवटा श्रृंखलाबाट स्टारडमको उत्कर्षमा पुगेका साउथ सुपरस्टार यश बुधबारबाट ३९ वर्षका भएका छन् । ‘रकिङ स्टार’को रुपमा चिनिएका उनको जन्मदिनमा नयाँ फिल्म ‘टक्सिक’को फर्स्टलुक भिडियो सार्वजनिक गरिएको छ । एक मिनेट लामो भिडियोमा यश ‘रोयल लुक्स’मा प्रस्तुत छन् । उनको क्यारेक्टर लुक्स देखाउन मात्र भिडियो सार्वजनिक गरिएको देखिन्छ ।
सेतो सुटबुटमा ठाटिएका यश गाडीबाट ओर्लिएर सिगार सल्काउँदै एउटा भव्य नाइटक्लबभित्र छिर्छन् । त्यहाँ मदहोस माहोल छ । क्लबमा उनी एक युवतीलाई काखमा लिएर आफू र उनीमाथि श्याम्पेन (मदिरा) खन्याउँछन् । यसले फिल्ममा यशको पात्र सन्की र मनमौजी स्वभावको रहेको दर्शाउँछ । उनको लुक्सले भने ‘केजीएफ’कै झल्को दिन्छ । उनी लामो दाह्रीमा प्रस्तुत छन् ।
फिल्मको निर्माता यश आफैं हुन् । उनको प्रोडक्सन कम्पनी मोन्स्टर माइन्ड क्रिएशन्सको ब्यानरमा निर्माण भएको फिल्मलाई गीतु मोहनदासले निर्देशन गरेकी हुन् । उनले यसअघि हिन्दी फिल्म ‘लायर्स डाइस’ र मलयालम फिल्म ‘मूथोन’ निर्देशन गरेकी थिइन् । ‘टक्सिक’को प्रदर्शन मिति भने घोषणा गरिएको छैन । यद्यपि, १० अप्रिलमा रिलिजको सम्भावना प्रवल छ ।
फिल्मको बारेमा निर्देशक मोहनदासले अमेरिकी म्यागजिन भेराइटीसँग भनेकी छन्, ‘यो यस्तो कहानी हो, जो परम्पराको खारेज गर्दै निश्चित रूपमा हामीभित्र अराजकता पैदा गर्छ । यो केवल हेर्न मात्र होइन, महसुस गर्ने फिल्म हो ।’ फिल्ममा यशको पनि सह-लेखन छ । यसमा उनको जोडी कियारा आडवाणीसँग बाँधिएको छ भने दिदीको भूमिकामा अभिनेत्री नयनतारा रहेको चर्चा छ ।
