राष्ट्रिय दलित आयोगको जातीय अनुसूचीमा विश्वकर्मा जातिलाई ‘कामी’ भनेर उल्लेख गरिएको छ । तर, यही समुदायका कतिपयले ‘कामी’ शब्दलाई अपमानजनक मान्ने गरेका छन् । यो शब्दलाई लिएर बेला बखतमा ठूलै बहस पनि हुने गरेको छ । २०७७ सालमा ‘कामी’ शब्दले विश्वकर्मा जातिलाई अपमान गरेको भन्दै यसको खारेजीको मागसहित सर्वोच्च अदालतमा मुद्धा समेत परेको थियो ।

तर, दलित (विश्वकर्मा) समुदायबाट प्रतिनिधित्व गर्ने गायक प्रकाश सपूतले भने आफ्नो निर्देशनमा बनेको पहिलो फिल्म ‘वसन्त’मा ‘कामी’ शब्द प्रयोग गरेका छन् । शनिबार सार्वजनिक ‘साँझ पर्‍यो झमक्क’ गीतको भिडियोमा फिल्मकी मुख्य अभिनेत्री स्वस्तिमा खड्काले प्रकाशलाई ‘कामी’ भनेर सम्बोधन गरेकी छन् । यो शब्दलाई लिएर गीत रिलिज कार्यक्रममै प्रश्न उठेको थियो ।

पत्रकारले प्रकाशलाई सोधेका थिए, ‘कतिपयले ‘कामी’ शब्द होच्याउने हिसाबले प्रयोग भयो भनिरहँदा तपाईंले यसलाई स्थापित गर्न खोज्नुभएको कि विवाद निम्त्याउन ?’ जवाफमा उनले फिल्ममा यो शब्दलाई होच्याउने हिसाबले प्रयोग नगरिएको दाबी गरे । ‘होच्याएर भनिँदा होच्याए जस्तो लाग्ने हो । तर, यो नेपालको थरहरुमा सूचीकृत छ । फिल्ममा जसरी प्रस्तुत गरिएको छ, त्यसले होच्याएको महसुस हुँदैन । त्यसलाई रमाइलो तरिकाले लिनुहुन्छ भन्ने मलाई लाग्छ ।’

यद्यपि, प्रकाश ‘कामी’ शब्दलाई लिएर हुने गरेको विवादको विषयमा बहस हुन जरुरी देख्छन् । भन्छन्, ‘मलाई लाग्छ यो बहसकै विषय हो । तर, यसलाई कसरी भन्यो भन्ने कुराले अर्थ राख्छ जस्तो लाग्छ । कामी, दमाई वा बाहुन भन्नु नेपालको सूचीकृत थरहरु हो । फिल्ममा जसरी भनिएको छ, त्यो होच्याउने हिसाबले भनिएको छैन । पूरै फिल्म हेरेपछि त्यो थाहा हुनेछ ।’

त्यस्तै, स्वस्तिमा कुनै पनि शब्द कुन नियतले भनिएको हो भन्ने कुराले अर्थ राख्ने बताउँछिन् । भन्छिन्, ‘गीतमा बाहुनी पनि भनिएको छ । बाहुनीभन्दा बाहुनीहरुलाई जिस्काएको जस्तो लाग्दैन होला । त्यसरी नै हेर्नुपर्छ जस्तो लाग्छ । नियत गलत छैन भने कसैले कसैलाई होच्याएको जस्तो हुँदैन ।’ उनी ‘कामी’ भनेको याद गर्नु तर बाहुनी भनेको याद नगर्नुलाई चाहिँ होच्याउने नियत मान्छिन् ।