प्रणय दिवसको दिन पारेर आगामी फागुन २ गतेबाट प्रदर्शनको तयारीमा रहेको फिल्म ‘रंगी’को पहिलो गीत सार्वजनिक गरिएको छ । आइतबार काठमाडौंमा एक कार्यक्रमका बीच सार्वजनिक ‘छ भने माया’ बोलको डान्सिङ नम्बरको गीतमा आनन्द कार्की र सुजता केसीको गायन, दुर्गेश थापाको शब्द तथा संगीत छ भने एरेन्ज तथा विमल चिनलको प्रोग्रामिङ, मिक्सिङ र मास्टरिङ छ ।

कविराज गहतराजको कोरियोग्राफीमा तयार भएको गीतको भिडियोमा फिल्मका मुख्य कलाकारहरु दीलिप रायमाझी, सलोन बस्नेत, नम्रता श्रेष्ठ, आयुषी ढकाल, विशाल पहारी र उत्तम केसी नृत्य गर्दै प्रस्तुत छन् । गीतमा सलोन र नम्रताबीचको प्रेम पनि देखाइएको छ । अडियो पक्ष बलियो भएकाले गीतलाई दर्शकले रुचाउन सक्ने देखिन्छ ।

गीत रिलिज कार्यक्रममा संगीतकार दुर्गेशले १० वर्ष पछाडिसम्मको मेलोडीलाई गीतमा समेटेको बताए । गायक आनन्द कार्कीले दुर्गेशको शब्द र संगीतमा गीत गाउने चाहना पूरा भएकोमा खुसी व्यक्त गरे । दर्गेशको पछिल्लो गीत ‘दुश्मन’मा पनि उनले आवाज दिएका थिए । गायिका केसीले आफूलाई सुन्दर गीतमा स्वर दिने अवसर दिएकोमा आभार व्यक्त गरिन् ।

सुरेश न्यौपानेको ‘डेब्यु’ निर्देशनमा तयार भएको फिल्ममा सक्षम सुवेदी, करिश्मा केसी बस्नेत र अनिश गौतम निर्मातामा छन् भने सुमन गजमेरको लेखन, सौरभ लामाको छायांकन, बन्दे प्रसादको सम्पादन, राजेन्द्र मोक्तानको कलर तथा कविराज गहतराज र शिशिर खातीको कोरियोग्राफी छ । ‘रंगी’लाई वितरक गर्ने जिम्मा एप्पल इन्टरटेनमेन्ट, एफडी र रिच इन्टरटेनमेन्टले लिएका छन् ।