आगामी फागुन १४ गते (महाशिवरात्रि)बाट प्रदर्शनमा आउन लागेको फिल्म ‘मायावी’को श्रृंखलाबद्ध रुपमा गीतहरु सार्वजनिक भइरहेका छन् । दुई हप्ताअघि सार्वजनिक ‘त्यो माया हो’ गीतले राम्रो हाइप बनाइरहँदा सोमबार दोस्रो गीत ‘टलटल टल्कियो’ सार्वजनिक गरिएको छ । गीतमा एसडी योगी र रेश्मा पुनको गायन, एसडी स्वयंको संगीत तथा राम अविरल विष्टको शब्द छ ।

कविराज गहतराजको कोरियोग्राफीमा तयार भएको गीतको भिडियोमा फिल्मका कलाकारहरु पल शाह, दीपिका प्रसाईं, समीम खान, करिश्मा श्रेष्ठ, सुशील सिटौला लगायत चित्रित छन् । दीपिका र समीमबीच इन्गेजमेन्ट भइरहँदा निराश देखिएका पलको भावना गीतले व्यक्त गर्छ । अघिल्लो गीत ‘त्यो माया हो’मा दीपिकासँग पलको प्रेम देखाइएको थियो ।

‘ऐश्वर्य’बाट लभस्टोरीमा आफूलाई प्रमाणित गरिसकेका दीवाकर भट्टराईको लेखन तथा निर्देशनमा तयार भएको फिल्ममा लक्ष्मी गिरी, प्रशान्त ताम्राकार, राजाराम पौडेल, अन्शु महर्जन, रवि डंगोल, राम प्रसाईं, दीपेन्द्र सिम्खडा, संगीता सिलवाललगायतको पनि अभिनय छ । फिल्मले प्रेम, मित्रता र वियोगको कथा भन्ने जनाइएको छ ।

‘मायावी’मा ध्रुव न्यौपाने, राज कटुवाल र चन्द्र पन्तको लगानी छ । प्रवीण भट्टराई र करण सिंह कार्यकारी निर्माता रहेको फिल्ममा मञ्जु भण्डारी, राजु पराजुली र सुमित ओली भने सह-निर्माताको रुपमा छन् । फिल्मको गीतमा एसडी योगीका साथै शम्भुजित बाँस्कोटाले पनि संगीत दिएका छन् । यसमा शाहिल खानको ट्रेलर, राजु विक्रम थापाको डीओपी तथा मिलन श्रेष्ठको सम्पादन छ ।