भ्यालेनटाइन डे (प्रणय दिवस)लाई लक्षित गर्दै आगामी फागुन २ गतेबाट प्रदर्शनमा आउने भनिएको फिल्म ‘ताण्डवम्’ एक साता पछाडि सरेको छ । अब यो फिल्म फागुन ९ गतेबाट प्रदर्शन हुनेछ । नयाँ प्रदर्शन मितिसहित मंगलबार फिल्मको एक पोस्टर पनि सार्वजनिक गरिएको छ, जसले मुख्य पात्रहरुको मनोदशा प्रस्तुत गर्छ । कोही रगताम्मे त कोही रोमान्टिक भावमा चित्रित छन् ।
लामो समयदेखि नेपाली फिल्ममा कलरिष्टको रुपमा काम गर्दै आइरहेका जुनिम गहतराजको डेब्यु निर्देशन रहेको फिल्ममा पुष्कर गुरुङ, प्रेम सुब्बा, सरिना मगर, अंकित खड्का, अनोज पाण्डे, जुनिम गहतराज, कमल कार्की, गोपाल कटुवाल लगायतको अभिनय छ । फिल्मका निर्माता धनकुमारी गहतराज, सविना मगर र मनिष गौतम हुन् ।
एक नवविवाहित जोडी पहिलो सन्तानको स्वागतको तयारी गरिरहँदा उनीहरुको जीवनमा घट्ने अकल्पनीय घटनाले निम्त्याउने उतारचढावको कथालाई पेश गरिएको फिल्ममा नामजस्तै धार्मिक कनेक्सन पनि रहेको जनाइएको छ । हरि घले लामाले खिचेको फिल्ममा सम्राट बस्नेतको द्वन्द्व निर्देशन तथा सुशान्त गौतमको संगीत रहेको छ । फिल्ममा अनिरुद्ध आत्रेय र हुसेनको लेखन छ ।
