यही माघ २५ गतेबाट प्रदर्शन हुन लागेको फिल्म ‘जुनाः एक व्यथा’को टिजर सार्वजनिक गरिएको छ । मंगलबार काठमाडौंमा एक कार्यक्रमका बीच सार्वजनिक २ मिनेट लामो टिजरले कथावस्तुबारे प्रकाश पार्छ । अभिनेत्री अस्मिता ढकालमा केन्द्रित टिजरले अनमेल विवाह गर्न बाध्य एउटी नाबालिगले पतिको घरमा भोग्नुपरेको दुःख र मानसिक पीडालाई मर्मस्पर्शी रुपमा देखाएको छ ।
जीवन सेञ्चुरीको निर्देशनमा तयार भएको फिल्ममा अस्मितासहित देशभक्त खनाल, रश्मी भट्ट, अनिता बस्नेत, कमल बोहोरा, कृष्णप्रसाद धिताल, अस्मिता बस्नेत, खगेन्द्र न्यौपाने लगायतको अभिनय छ । फिल्मको दर्जनौंपटक च्यारिटी शो भइसकेको छ । केही ठाउँमा फिल्म हेर्ने क्रममा दर्शकहरु रोएर बेहोस समेत भएको निर्देशक सञ्चुरीले बताए ।
बाल विवाह र महिला हिंसाविरुद्धको कथावस्तुमा आधारित भएर बनेको फिल्मका निर्माता दीपकप्रसाद घिमिरे हुन् । ‘बुलाकी’बाट लेखनमा राष्ट्रिय अवार्ड जितेका राजबहादुर सानेको कथा रहेको फिल्ममा बीबी अनुरागी र रमेश सेञ्चुरीको संगीत, जीवन सेञ्चुरी र भीमबहादुर पौडेलको शब्द, अञ्जु पन्त, पूर्णकला बिसी र यदुराई लकान्द्रीको पार्श्व गायन तथा रामेश्वर हुमागाईंको डीओपी छ ।
